Issittumi Sakkutooqarfik mingutsitsinermik akiuinialersoq

Issittumi imartat sunnertiasut mingutsinneqarnerat annerusumik isiginiarneqartussanngorpoq. Issittumi Sakkutooqarfik qaammatip aallartinneranit atuutilersumik umiarsuarnik Kalaallit Nunaata imartaaniittunik avatangiisinut tunngatillugu misissuiniarluni nalunaaruteqartalerpoq. Umiarsuarlu alapernaarsuut Knud Rasmussen septembarip aallaqqaataani siullerpaamik taamaaliorpoq.
Allattoq Peter Troelsen, Simon Uldum
septembarip 03-at 2013 06:52

Avatangiisinut tunngatillugu misissuinissamik nalunaaruteqarnermi umiarsuit assartuutit, avatangiisinut ulorianaateqarsinnaasunik useqartut orsussamillu avatangiisinut ulorianaateqarsinnaasumik atuisut Issittumi Sakkutooqarfiup umiarsuaanit timmisartuinillu attavigineqartarput. Umiarsuit assartuutit ilaatigut usitik, orsussamik sumik atuinerlutik sumullu ingerlaarnerlutik paasissutissiisassapput. Peqatigisaanik aamma Umiarsuit assartuutit nunatta imartaani imermik minguitsumik taamaallaat kuutsitsisinnaallutik paasitinneqartassapput.

Umiarsuit usit orsussaasivinnillu saliisarnerinut paasissutissaataannik misissuinissamut aamma periarfissaqassaaq. Taamaaliornikkut nunatta imartaani uuliamik kuutsitsisimasut nassaarinissaat ajornannginnerulissaaq. Taamatut suliniuteqarneq Issittumi Sakkutooqarfiup imaani avatangiisinut periusissaata ilagaa.

Avatangiisinut tunngatillugu misissuinissamik nalunaaruteqartarneq Danmarkimi atorneqartup assingaa, Søværnets Operative Kommandollu umiarsuit Danmarkip imartaatigut angalasunut akulikitsumik attaveqarfigisarpai.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq