Issittumi sakkutooqarfeqarnissaq nukingiunnerulerpaat
Nunaqarfimmi tassani timmisartoq minniarnermini qaammatit arlaqanngitsut matuma siorna ajutoorpoq, inuillu aqqaneq-marluk ajunaarlutik.
- Uanga ima paasivara, ukiaq ajutoornerup ersersissimagaa sakkutooqarfeqalernissap qanoq pingaaruteqartiginera, tassanngaanniimmi aannaassiniarnerit aamma ingerlanneqarsinnaasassammata, Bill Chambré, Canadami illersornissamut ministeriaqarfimmeersoq, CBC Newsimut oqarpoq.
Sakkutuut sungiusartarfissaannut, Kalaallit Nunaannit 1000 kilometeriunngitsulluunniit ungasitsigisumiittussamut, siunertarineqartoq pilersaarutigineqarsimasunit allanngulaarsimasoq, naalakkersuisut aallartitaat paasisitsivoq.
Naalagaaffiup issittup avannaarsuani naalagaaneranik sakkutooqarfik takutitsiinnarnani maannali aamma annaassiniartarnissamut ajunaarnissamullu sillimanermut atorneqarnissaa pingaartinneqalerpoq.
Canadamili naalakkersuisut erseqqissaatigaat sakkutooqarfik ukioq kaajallallugu inoqartartussaanngimmat ujaasinernut annaassiniarnernullu atortuaannarsinnaanngitsoq. Sakkutuunut 140-nut, sulisunullu sakkutuujunngitsunut, inissaqassaaq, sananeralu, 100 millionit koruunit missaannik akeqassasoq, 2013-imi naammassineqarsimassasoq naatsorsuutigineqarluni, CBC News allappoq.
Nittartakkami oqaaseqaaterpassuit ersersippaat aningaasat taama amerlatigisut sakkutooqarfimmut atorneqarnissaat naalakkersuisulluunniit issittup avannaarsuani illut iluameersut imerlu minguitsoq akissaqartinngimmassuk atuartartut mamiagigaat.
Naggueqatigiit Inuit amerlasuut pinngitsaalisaallutik Qaasuitsumut 1955-imi nuutsitaasimapput. Taamani avannaarsuani piniagassaqarnerunera utoqqatsissutigineqarsimavoq, taamaaliornerli Canadap issittup avannaarsuani naalagaanini takutinniarlugu naggueqatigiit Inuit atorsimagaat inunnit amerlasuunit ilimagineqarpoq. Maannali tamanna Qaasuitsumi sakkutooqarfiliornissamut siunertat ilagigaat isertuunnagu oqaatigineqarpoq.
