Issittumi pisut pillugit suleqatigiittoqarnerunissaanik isumaqatigiipput

Issittumi pisut pillugit suleqatigiittoqarnerunissaa, Issittumilu misilittakkanik paarlaasseqatigiittoqarsinnaanissaa, Danmarkip nunanut allanut tunngasunut ministeriata Martin Lidegaardip, Norgellumi nunanut allanut tunngasunut ministeriata Børge Brendep, Arctic Frontiersimik taallugu Norgep avannaani illoqarfimmi Tromsømi ataatsimeersuartoqarnerani isumaqatigiissutigaat.
Allattoq Mads Lynge
januaarip 21-at 2015 16:57

- Danmark Norgelu Issittoq pillugu misilittagaqarput imaannaanngitsunik, tamannalu atorluarniarsaraarput, Martin Lidegaard oqarpoq, nunallu taakku marluk Issittumi Siunnersuisoqatigiinni suleqatigiillualereernerat eqqaasitsissutigalugu.

 

Issittumi Siunnersuisoqatigiit Canadami Iqalunni ukioq manna apriilimi ataatsimiilerpata USA Canada kingoraarlugu siulittaasunngussaaq, EU-llu Siunnersuisoqatigiinni alaatsinaattunngorsinnaanissaa, Danmarkip nunanut allanut tunngasunut ministeriata ilungersuutiginiarpaa.

 

Arctic Frontiersimi saqqummiussinermini tamanna erseqqissaatigaa, soorlu aamma Danmarkip silap pissusia pillugu Parisimi aappaagu ataatsimeersuartoqarnissaanut, COP21-mik taaguutilimmi, silap pissusiata allanngoriartorneranut atatillugu iliuuseriniagai saqqummiukkai.

 

Parisimi isumaqatigiissusiortoqarsinnaanissaa Martin Lidegaardip naatsorsuutigaa, anguniagaqarusussuseqarpallaannginnissaali ernummatigalugu.

 

- Angusaqartariaqarpugut, taamatummi angusaqarsinnaanissamut periarfissat amerlanngillat, Martin Lidegaard, Arctic Frontiersimi oqalugiarnermini ilaatigut oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq