Issittumi nakkutilliineq, sillimaniarneq illersornissarlu
Nalunaarusiami atuarneqarsinnaavoq Danmarki navianartorsiortinneqaleriaanaasoq, taakkununnga ilaalluni Issittup imartaanik nunataanillu nuna sorleq piginnittuunermut apeqqummut atatillugu Ruslandip siunissami ajugaarusuttuarnissaa. Illersornissamut qullersaqarfiup paasiniaasartuisa nalunaarusiornerminnut atatillugu aaatsaavissuaq nutaarsiassaqartitsivinnut oqaaseqarput.
- Illersornissamut qullersaqarfiup paasiniaasartui FE peqqarniisaarniat Al-qaedakkut kilitsissiaannit unammillerneqartuarput, taamalu aamma russinit siunissami unammillerneqartuarnissaminnit ilimasullutik. Peqqarniisaaniartoqarnissaanik navianartorsiortitaanermik saniatigut Afghanistanimi danskit sakkutuui saassunneqartuarput. Taamaammat aamma Issittumi pisut sillimaffigisariaqarput. Silaannaap kissatsikkiartuinnarneranit Kalaallit Nunaata Qalasersuullu akornanni imartaq ukiuni tullerni angallaffinngoriaannaavoq uuliasiorfinngoriaannaallunilu. Pisuussutit taanna russit perusuttorujussuuaat. Taamaammat Danmarki tamaviaartinneqariaannaavoq. Taamaammat-una aamma Atlantikup avannaani aalisarnermik killeqarfinnillu alapernaarsuineq annerulersinniaripput. Issittumi sakkutooqarfiliussaagut issittumilu sakkutooqatigiinnik pilersitsissalluta, Illersornissamut qullersaqarfiup paasiniaasartuini pisortaq Finn Hansen oqarpoq.
Finn Hansen Claus Buhrimit apersorneqarluni aamma oqarpoq, Issittup imartaanik nunataanillu piginnittuunissamik apeqqut Danmarkimut, taamaalillunilu aamma Kalaallit Nunaannut ulorianartorsiortitsisoq. Taamali oqarnera Illersornissamut ilinniarfiup sakkutooqarnermut ilisimatusarfiani pisortamit major Henrik Jedi Jørgensenimit sakkortukulunnerarneqarpoq.
- Nalunaarusiaq saqqummersoq nalunaarusiarineqartartuni kisimiinngilaq. Nalunaarusiani allani aamma oqaatigineqareerpoq Issittumi sakkutooqarnermut tunngasumik aaqqiaginngitsoqarnavianngitsoq. Soorunami issittup imartaani angallattoqarnerulernissaa sillimaffigisariaqarpoq. Ruslandip anguniagaatut taagorneqartut ingasattajaarluni nalilertariaqanngillat.Soorlu Danmarkimi aviisit ilaat taama naliliiniartoq. Issittumi imartat nunatallu nunamit sorlermit pigineqarneri maanna paasiniarneqaleruttorpoq, tassanilu Naalagaaffiit Peqatigiit Immat atorneqarnerat pillugu isumaqatigiissutaat, Ruslandip, Norgep, Danmarkip Canadallu suleqataaffigisaat qitiuvoq. USA-mi nunani issittumi soqutigisalinni kisiartaalluni isumaqatigiissummi atsioqataasimanngilaq. Paasissutissanik nutaanik utaqqinermi soorunami Ruslandip suliani illersorlugit issittumi sakkutooqartitsiuartariaqassaaq, tamannali aarlerissutaasariaqanngilaq, Henrik Jedi Jørgensen oqarpoq.
