Arctic Circle Issittumi ineriartorneq nunatsinnut iluaqutaassasoq

Issittoq pillugu ilisimasallit nunanit 50-ineersut 2300-init amerlanerusut Reykjavikimi sapaatit akunnerani matumani Arctic Circlertoqarnerani peqataapput.

Nunatsinnit aallartitat workshoppini, oqalugiarnerni oqallinnernilu peqataapput.

Piujuaannartitsinissaq tunngavigalugu ineriartorneq, ineriartornermilu suut anguniarneqartariaqarnersut, ilaatigut oqallisigineqarput.

Silallu pissusiata allanngoriartornera piujuaannartitsinissarlu tunngavigalugu ineriartorneq pissutigalugit Issittoq silarsuarmi pingaarneruleriartuinnarmat Issittup ukkatarineqarnissaa naleqquttoq oqalliseqataasoq, folketingimut ilaasortaq, Aleqa Hammond, radioaviisimut oqarpoq.

Issittumi ineriartorneq nunatsinnut iluaqutaassasoq

Silarsuarmi aningaasaqarnikkut inissisimaneq allanngussasoq, nunallu inoqqaaviusugut ineriartornermut tassunga peqataanissarput pingaartorujussuusoq, Aleqa Hammond oqarpoq.

Nunap inoqqaavi silap pissusiata allanngoriartornera pillugu oqallinnernut qitiusumik inissisimanngippata, taava oqalliffinni nunap inoqqaavi pillugit oqallittoqaannartassaaq. Aamma silap pissusiata allanngoriartornerata piujuaarnartitsinissarlu tunngavigalugit ineriartornerup malitsigisaannik silarsuarmi aningaasaqarnikkut inissisimaneq allanngorpat, uagut aningaasaqarnikkut siuariarniassagatta oqallinnernut peqataasariaqartugut, Aleqa Hammond oqarpoq.

Arctic Circle sapaatiuppat naammassissaaq, tassanili isumassarsiat oqallisigineqartullu sivisuumik oqallisigineqassapput.