Issittumi inatsisartut aalajangersakkatigut isumaqatigiissuteqartut
Naalagaaffiit Peqatigiit Silap pissusia pillugu Parisimi upernaaq manna isumaqatigiissusioreersullu Issittumi Siunnersuisoqatigiit taama aalajangersaapput.
Issittumi nunani assigiinngitsuni inatsisartunut ilaasortat Ruslandimi illoqarfimmi Ulan-Udemi ataatsimeeqqammerput, nalunaarutaallu Issittumi nunani naalakkersuisunut tamanut nassiunneqarpoq.
Siumut sinnerlugu Folketingimut ilaasortaq Aleqa Hammond nunarput sinnerlugu peqataavoq, Sjurdur Skaalelu Magni Argelu Savalimmiut sinnerlugit peqataallutik.
Nunat Issittumiittut ukiuni kingullerni soqutigineqaleraluttuinnartut Aleqa Hammondip eqqaasitsissutigaa:
- Taamaattumik Issittumi akisussaassuseqartumik politikkeqarnissaq nunat akimorlugit naalakkersuinikkut naapeqatigiissuteqarnissaa aatsaat taama pingaruteqartigaaq. Naapeqatigiissutaasumi silaannaap allanngoriartornerata nassatarisaanik ajornartorsiutit pilinnginnerini periarfissat nutaat nammineerluni sulissutigisariaqarparput, aammalu nunap inoqqaavi peqataatillugit sanaartornermi aningaasaliissuteqarnissamut nungusaataanngitsumillu inuussutissarsiornikkut ineriartortitsinissamut aqqutissiuussisoqartariaqarpoq, Aleqa Hammond oqarpoq.
Issittumi inatsisartut ukioq allortarlugu ataatsimiittarput.
