Issittumi ilisimasassarsiortut umiarsuaat qangali ujaarineqartoq nassaarineqartoq

2008-mili canadami naalakkersuisut akiligaannik aasat tamaasa Sullualummi tuluit Franklinekspeditionimik taallugu ilisimasassarsioraluartut qimataannik ujarlertitsisarput. Taakku 1845-mi Sullualuk ujarniarlugu aallaraluarput.

Canadami tv-qarfiup CBC-p nassaarineqartoq pillugu ilanngutassiaa uani isiginnaarsinnaavaat:

Umiarsuit marluk Erebus aamma Terror sikkussaapput, isumaqartoqarporlu inuttaat ukiut marluk missaanni umiarsuarni najugaqarsimasut, umiarsuilli sikumit aserorneqarput inuttaallu ajunaarput.

Umiarsuit ukiorpassuarni ujaarineqarsimapput, naggueqatittali piniartut umiarsuit pillugit oqaluttuat ilisimavaat, ilisimasaqartutullu ujarlertut ujaasiffissaannik innersuussimallugit.

Ministeriunerup Stephen Harperip naammagisimaaqaluni nalunaarutigaa umiarsuup aappaa sapaatip akunnerani uani nassaarineqarsimasoq. Taannami ujaasinernut pimoorullugu soqutiginnissimaqaaq. Tusagassiuutinullu oqarpoq ulloq oqaluttuarisaanermi Canadamut pingaaruteqartoq.

Tuluimmi umiarsuarimmatigit Dronning Elizabeth pilluaqqussummik telegramersimavoq.

Umiarsuaq nassaarineqarpoq Sullualummi King Williamip qeqertaata kujasik-kippasissortaani. Nassaarineqarfippiaa pisortatigoortumik saqqummiunneqanngilaq, ilisimaneqanngilarlu umiarsuaq sorleq nassaarineqarsimanersoq.