Avannaarsuanut ilisimasassarsiornermut peqataarusukkuit angumerisinnaavat
Ilinniartoq nunatsinneersoq,WWF, Nunarsuaq tamakkerlugu pinngortitaq pillugu suliniaqatigiiffimmit, tapiiffigineqarluni Issittumi angalaassalluni ilinniartut immikkut toqqakkat allat 100-t peqatigalugit periarfissinneqarpoq. Ilisimatuut, eqqumiitsuliortut, atuakkiortut, nipilersortartut ilinniartitsisullu aamma angalaqataassapput.
Sisimiormiu Malu Ostermann siorna angalaqataavoq:
- Angalaarneq aatsaat taama nuannertigisoq misigaara. Ukioq manna angalaqataaqqikkusussinnaagaluarpunga, Malu Ostermann oqarpoq.
Aamma atuaruk VIDEO Avannaarsuani ilisimasassarsiornermi peqataasussanik pissarsiorneq
Ilisimasassarsiorluni angalaneq juulip ulluisa 21-anni aallartissaaq, aggustillu ulluisa tallimaanni naammassineqassalluni.
Ilisimasassarsiortussat piareersassallutik imminullu ilinniassallutik Ottawami, Canadamiittumi naapissapput. Tassanngaanniit Quebecimi Kuujjuarmut ilisimatuut umiarsuaannut M/V Ocean Endeavorimut ikiartussapput. Canadamiut nunaqarfii, Baffin Islandip kangerlui sineriaalu angallavigissavaat, ilaatigullu Auyuittuq National Park aamma aqqusaarneqassalluni. Kingorna umiarsuaq David Strædetikkuussaaq Ilulissallu aamma Itilleq tikinneqassallutik. Ilisimasassarsiorneq Kangerlussuarmi naammassissaaq.
Issittoq takornariaruk
Issittumi pinngortitaq, uumasoqassuseq inuillu inuunerat annertunerusumik ilisimasassarsiorfigineqarnissaat angalanermi siunertaavoq.
- Silap pissusiata allanngoriartornera pillugu ilikkagaqangaatsiarpunga, Issittumut Issittormiunullu qanoq sunniuteqarnersut. Ataatsimoorluartarpugut, allaanginnami immitsinnut ilisimariuarsimalluta. Assigiimmik soqutigisaqarnerput peqqutaasoq ilimagaara, Malu Ostermann oqarpoq.
WWF, Nunarsuaq tamakkerlugu pinngortitaq pillugu suliniaqatigiiffik, Danmarkimiittoq kalaallip peqatasussap aningaasartuutissai akilissavai. Qinnuteqarfissaq kingulleq tassaavoq apriilip aallaqqaataa. Nunatsinni Ilinniartuuguit, 14-it 18-illu akornanni ukioqaruit ilisimassarsiornissamut qinnuteqarsinnaavutit. Uani paasisaqaqqigit www.wwf.dk , www.studentsonice.com quppersakkamilu ataaniittumi: