VIDEO Avannaarsuani ilisimasassarsiornermi peqataasussanik pissarsiorneq
Kalaallip ilinniartup ataatsip, Avannaarsuani ilisimasassarsiorluni angalasinnaanissaa, Pinngortitaq pillugu Nunarsuaq tamakkerlugu suliniaqatigiiffiup, Verdensnaturfondenip, ukioq manna aamma akilissavaa, inuusuttut ilinniartut immikkut toqqakkat allat 100-t peqatigalugit Nunarsuup Avannaarsuanut angalanissaat akilissallugu.
Canadap Nunattalu avannaarsuani angalasoqassaaq, Nunatta kitaata sineriaa atuarlugu angalasoqassalluni.
Issittumi pinngortitaq, uumasoqassuseq inuillu inuunerat annertunerusumik ilisimasassarsiorfigineqarnissaat angalanermi siunertaavoq.
Angalanissarlu puigunaatsuussaaq. Malu Ostermann, Sisimiuneersoq, siorna peqataasoq, taama oqarpoq.
- Angalaarneq aatsaat taama nuannertigisoq misigaara. Ukioq manna angalaqataaqqikkusussinnaagaluarpunga, Malu Ostermann, tusagassiutinut nalunaarummi ilaatigut taama oqarpoq.
Aamma atuaruk ASSIT Malu Sisimiuneersoq aasaanerani paasisassarsioqataalersoq
Ilisimasassarsiorluni angalaneq juulip ulluisa 21-anni aallartissaaq, aggustillu ulluisa tallimaanni naammassineqassalluni. Angalaneq Quebecimi Kuujjuarmit aallartissaaq, Kangerlussuarmilu naammassineqassalluni.
Verdensnaturfondenip "Students on Ice"-imik taallugu ilinniartunik nunanit tamalaaneersunik angalatitsisarneranut peqataaniaraanni qinnuteqaat kingusinnerpaamik marsip ulluisa aqqarnani nassiunneqarsimassaaq.
Qinnuteqarnissamut immersuiffissat Verdensnaturfondenip nittartagaani aaneqarsinnaapput wwf.dk soorlu aamma studentsonice.com-imi aaneqarsinnaasut.
