ASSIT Malu Sisimiuneersoq aasaanerani paasisassarsioqataalersoq
Nunarsuaq tamakkerlugu pinngortitaq pillugu suliniaqatigiiffiup WWF-ip kalaallimut ilinniartumut ukiumoortumik tapiissutigisartagaanik tunineqarpoq, taamaasillunilu angalanermut peqataasinnaanngorluni.
Ilinniartut inuusuttut nunarsuarmit tamaneersut 100-t Canadami illoqarfiit pingaarnersaanni Ottawami ataasinngorpat naapissapput. Tassanngaanniit timmisartorlutik Kangerlussualiassapput umiarsuarmut ilaaffissaminnut ikiartorlutik. Sineriak atuarlugu angalassapput, ilaatigut Itilleq, Ilulissat aamma Uummannaq tikinneqassallutik.
Kingorna Ikkannersuaq Davis ikaassavaat, ilinniartullu ilaatigut Pond Inlet, Sirmilik Nationalpark aamma Beechey Island tikissavaat, angalanerlu Resolute Bayimi naggaserneqassalluni.
AAMMA ATUARUK Students on Ice WWF-ilu inuusuttumik ilisimasassarsiornermut peqataasussarsiorput
- Nunarput sinnerlugu angalanissannut qilanaarpunga. Uummannamit Canadamut angalanissaq misigisassanni pissanganarnerpaatippara, Malu Ostermann aallanngilaattaa taama oqaluttuarpoq.
Paasisassarsiorluni angalanermi silap pissusiata allanngoriartornera, pinngortitaq pillugu ilisimasatoqqat sammisallu issittumut tunngasut pingaarutillit allat sammineqassapput. Pinngortitarlu silallu pissusia pingaartilligit Malu Ostermann ima oqaluttuarpoq:
- Isumaqarpunga pinngortitarsuarput alianaaneqisoq paarilluassallugu pingaaruteqartoq, allamimmi taarsernissaqanngilaq.
Malu Ostermann kalaallimik allamik angalateqassaaq, tassalu Nivi Bak Hansen.
Nivi Bak Hansen 19-nik ukioqarpoq, Tasiilamingaaneersuulluni. Nivi maannakkut Sisimiuni najugaqarpoq, Sisimiuni GUX-imi atuarluni.
Paasisassarsiorlutik angalasut angusaallu nittartakkami studentsonice.com-imi malittarineqarsinnaapput.
