Issittumi borgmesterit kattuffiat pilersinneqartoq

Kommuneqarfik Sermersuumi borgmesteri, Charlotte Ludvigsen Islandimi, Akureyrimi, Arctic Mayors Forum tassa issittumi borgmesterit kattuffiat ippassaq sisamanngornermi pilersinneqarmat atsioqataasut ilagivaat.

Kattuffiup siunertarivaa, siunissami issittut nunaanni najugallit, nunanit tamalaanit eqqartorneqartillugit issittumi najugallit pingaartitaasa inooriaasiisalu ilaatinneqartarnissaasa qulakkeerneqarnissaat.

- Ukiuni makkunani uagut inuuffigisarput assorsuaq soqutigineqarpoq, nunallu amerlasuut Issittoq pillugu soqutigisaminnut periusissiorsimapput. Soqutiginninnerli taanna uagutsinnut najugaqartuusunut iluaqutaassappat pingaaruteqartuuvoq najugaqartut soqutigisaat nunani tamalaani aallunneqarpata, Charlotte Ludvigsen oqarpoq.

Kommune Qeqertalimmi borgmesteri, Ane Hansen pilersitseqataasuni aamma ilaavoq.

AAMMA ATUARUK Kielsenip Kofodillu Issittoq pillugu ataatsimeersuarneq aallarneraat

- Issittumi borgmesterit ataatsimoorfeqarnissaat pingaaruteqarpoq, taamaalilluta nipi nukittunerusoq ataatsimoorluta oqariartuutigisinnaagatsigu, aamma apeqqutit annertuut nunat tamalaat akornanni sammisanut tunngasut pineqaraangata, Ane Hansen oqarpoq.

Borgmesterinit qulingiluat, Savalimmiunit, Islandimit, Norgemit, Finlandimiit, Alaskamit kiisalu nunatsinnit peqataapput.

Arctic Mayors Forumimit massakkut Issittumi Siunnersuisooqatigiinni alaatsinaattutut inissisimatinneqarnissaq qinnutigineqassaaq.

Issittup soqutigisaasa tapersersorneqarnissaat pillugu kattuffik aamma suliaqartarniarpoq, ataatsimut nalunaarutigineqartartussanik.