Issittumi attaveqarneq ataatsimeersuarnermi immikkut sammineqalersoq
Imaatigut silaannakkullu assartuussinissamut periarfissat pitsaasuunissaat issittumi inuiaqatigiinnut, minnerunngitsumillu Nunatsinnut, pingaaruteqartupilussuuvoq.
Taamaammat ilisimatusarnikkut tunngavilimmik aaqqiissutaasut atorlugit Issittumi attaveqarnerup ingerlalluartup ineriartortinnissaanut pilersaarusiorneqarnissaallu qanoq iliortoqarsinnaanera pillugu DTU immikkut sammisaqartitsiniarpoq.
Nunap qeriuaannartup Nunatsinni nutaanik mittarfiliortiternermut pioreersullu aserfallatsaaliorneqarnerinut qanoq sunniuteqarnera ilaatigut oqaluuserineqassaaq.
AAMMA ATUARUK Aqqutilersuutit pitsaasuunnginneri Qaanaami suliffinnik nutaanik pilersitsinissamut aporfiusut
Ataatsimeersuarnermilu ilaatigut USA-mit, Canadamit, Norgemit, Finlandimit kiisalu Nunatsinnit Danmarkimiilluni saqqummiussisoqassaaq.
Nunatsinni Danmarkimilu oqartussaneersut inuussutissarsiutinillu ingerlatalinneersut Isittumi attaveqarnerup pilersaarusiorfigineqarnissaanut tunngatillugu ajornartorsiutaasut aaqqiissutaasinnaasullu pillugit saqqummiissapput.
Ataatsimeersuarneq Qeqqata Kommunia Teknikkimillu Ilinniarfik (KTI) suleqatigalugit aaqqissuunneqartoq Sisimiuni kulturikkut illorsuarmi Taseralimmi ingerlanneqassaaq.