Aqqutilersuutit pitsaasuunnginneri Qaanaami suliffinnik nutaanik pilersitsinissamut aporfiusut
Namminersorlutik Oqartussat suliffeqarfiutaanni anginerni tamanna aamma eqqarsaatigineqartariaqarpoq. Kaare Hendriksen, inuussutissarsiorneq pillugu Qaanaami sapaatip-akunnerata siuliani isumasioqatigiittoqarnerani peqataasoq taama oqarpoq:
- Nunap immikkoortua teknikkikkut atortulersugaanikkullu unammilligassaqangaatsiarpoq. Tamanna ajuusaarnaqaaq, Kaare Hendriksen, Qaanaami inuussutissarsiornikkut ineriartortoqarneranik ilisimatusarsimasoq taama oqarpoq.
Suliassaqarfiit pingasut pingaartumik tikkuartorneqarput, tassa qaleralinniarneq, takornariaqarneq Issittorlu pillugu ilisimasat avammut nittarsaassinermut atorneqarsinnaasut, suliffissaqartitsiniarnermullu iluaqutaasinnaasut.
Tamaanilu nunap atortulersugaanera pitsanngorsaavigineqassappat Namminersorlutik Oqartussat, kommuni namminersortullu suleqatigalugit isumagisariaqaraat Kaare Hendriksen isumaqarpoq.
Aalisarnerup takornariartitsinerullu iluanit suliffissat nutaat
Assersuutigalugu aalisarnermi. Suliffeqarfiit mekanikeri ataaseq avitseqatigiinnikkut atorsinnaavaat, biilit assartuussutit iluarsartuunneqarsinnaanissaat pillugu suleqatigiissinnaallutik, suliassanillu allanik aamma atorneqarsinnaalluni:
- Suliffeqarfiup ataatsip mekanikeri ataaseq kisermaassinnaanngilaa, suliassammi killeqarmata, mekanerilu Qaanaami namminersortutut naammattunik suliassaqartinneqarsinnaagunanngilaq. Mekanikerili suliassanut assigiinngitsunut ilinniarsimasoq atorfissaqartinneqarsinnaavoq, avitseqatigiinnikkullu aningaasartuutigineqarsinnaassalluni, Kaare Hendriksen oqarpoq.
Qaanaami talittarfeqarsinnaanissaa pillugu aaqqiisoqarnialerpoq. Aalisakkalli pisarineqarsimasut assartorneqarnissaat qulakkeerneqassappat, aalisakkallu Danmarkimi pisiniarfinnut anngussinnaanissaat qulakkeerneqassappat, taava umiarsuit tikittartut amerlanerusariaqarput, Royal Arctic Linelu matumani qitiulluinnarpoq:
- Royal Arctic Linep Qaanaamukartitsinerusinnaanera isumasioqatigiinnermi ilaatigut oqallisigineqarpoq, tassa Royal Arctic Linep Qaanaamukarnerusalersinnaanissaa Naalakkersuisut neriuutigimmassuk. Umiarsuit Qaanaamut ukiumut marloriarlutik maanna tikittarput, Kaare Hendriksen oqarpoq.
Assersuutigaluguli Qeqertani innaallagissiortoqanngilaq, Nukissiorfiillu tamanna eqqarsaatigisariaqarpaat:
- Pissutsit taamaatsillugit tassani tunitsisoqarsinnaanngilaq. Taamaammat innaallagissiorfeqalersinnaanersoq misissorneqalerpoq, tunitsiveqalersinnaaniassammat. Qeqertammi eqqaanni sivisunerusumik qaleralinniartoqarsinnaavoq, qaleralinniarneq Qaanaamut sanilliullugu qaammatinik marlunnik sivisunerusinnaalluni, Kaare Hendriksen oqarpoq.
Taassuma taamaammat oqaatigaa suliffeqarfiit assigiinngitsutigut suleqatigiissuteqarsinnaasut, namminneq aningaasartuutikinnerusinnaassallutik, inuiaqatigiinnullu aamma aningaasartuutikinnerulersitsisinnaalluni, Kaare Hendriksen oqarpoq.
- Pissutsit pitsaanerulersinneqarlutik aaqqiivigineqarpata, suliffissaqartitsiniarnikkut piorsaasoqarpat, taava assersuutigalugu isumaginninnermut aningaasartuutit ikilisarneqarsinnaapput. Inuiaqatiigillu ataatsimut isigigaanni aningaasartuutit taamaalinikkut ikilisarneqarsinnaallutik, Kaare Hendriksen, Center ofr Arktsik Teknoligimi, DTU-mi, lektori, oqarpoq.
