Issittoq pillugu pilersaarutissaq: Ataatsimoorneq pissaanillillu nakkutigalugit

Nunatta, Savalimmiut Danmarkillu issittoq pillugu siunissaq ungasinnerusoq isigalugu aappaagumut iliuusissatut pilersaarusiortussaavaat.

Pilersaarutissammilu pingaarnersiuinissamut nunat taakku pingasut kisiimiillutik isummersunnginngillat.

Asta Helms Lasse Oszadlikilu aamma isummersoqataapput. Taakku pilersaarummi suut pingaarpaasariaqarnerannik allaatigisamik naatsumik eqqarsaatinik saqqummiiffiusumi allaatigiisaqaramik, unammisitsinermi ajugaapput.

Taakkua peqatigiiffimmit nunani allani pissutsinik sammisaqarfiusumit, Det Udenrigspolitiske Selskabimit, aamma nunanut allanut ministereqarfimmit unammisitsisuussunit ajugaasutut suaarutigeqqammerpai.

AAMMA ATUARUK Sillimaniarnermik immikkut ittumik ilisimasalik: Amerikamiut soqutiginnimmata politikkikkut siunnersorti Nuuliarpoq

Asta Helmsip isumaa malissagaanni pilersaarusiornermi silap pissusiata allanngoriartornera, Issittumik sunniisoq, eqqumaffigisassaavoq. Pilersaarutip aamma una akissuteqafigissavaa:

- Kalaallit Nunaat, Savalimmiullu namminersortunngornissamik kissaateqaraluartut, nunat pingasut taakku ataqtigiiginnarnissaat qanoq qulakkiissaneripput.

Nunanut allanut ministeriaqarfiup, Facebookimi videoliami ilisaani, Asta Helms oqarpoq.

Pissaanillit eqqarsaatigalugit politikkiliorneq

Kunngeqarfiup USA-p, Kinap Ruslandillu issittumi iliussaannut qanoq pisuseqarnissaa, Lasse Oszadlikip allaatigisamini ilaatigut isiginiarpaa.

- Kina, Rusland aamma USA tamarmik immikkut kunngeqarfiup avissaartuutilerfiunissaanut ukiuni tulliuttuni qulini ulorianartorsiortitsipput, taavalu Kalaallit Nunaat Savalimmiullu attanneqarsinaanngitsumik inissisimatissallugit. Taamammat issittumi iliuusissatut pilersaarutikkut Kunngeqarfiup ataasiuinnarnissaa ukkatarisariaqarpoq, taanna videomi oqarpoq.

Issittoq pillugu iliuussissatut pilersaarut 2030-ip tungaanut atuutissaaq. Manamut atuuttoq ukiortaami atorunnaassaaq.