Issittoq pillugu aallartitaq: IWC pillugu aaqqiissuteqarnissaq nalunarpoq

Qallunaat nunanut allanut ministeriat juuni qaammataagaa nalunaarpoq Danmark IWC-mit ukiup nikinnerani aniniartoq - isumaqatigiinniarnerit iluatsinngitsut pissutigalugit nunatta 2013-mut pisassat nammineerluni amerlassusilerpai. Ullumikkut pissutsit qasukkaamisimapput, decemberimi qallunaat arfanniarnermut kommissæriat IWC-mut allappoq, qallunaat ataatsimiititaliamiiginnarumasut septemberimi isumaqatigiinniarnermi isummanik naapeqatigiisitsinissaq anguniarlugu.

Nunat angisuut tassaasut USA, Rusland, Australia Japanilu nalunaarput, septemberimi 2014-mi isumaqatigiinnissaq anguniarlugu isumaqatigiinniarniarlutik. Tamarmilli uatsitulli isumaqatiginiarusunngillat, misileerusuppungulli.

- Siusippallaarpoq isummanik naapeqatigiissitsinissaq qanoq ingerlajumaarnersoq oqaatigissallugu, Erik Vilstrup Lorentzen oqarpoq.

-Akerleriissutaasoq tassaavoq Kalaallit Nunaata kissaataa tikaagulliusaartassat qulingiluanik ilallugit pisassat katillugit 19-ngortinnissaat. Ukiulli kingullit pingasut pisassissutit tamakkerneqartarsimanngillat, 2012-imi pisassiissutinit quliusunit tallimaannaat pisarineqarsimapput.

-Pisassanik qaffaanissaq Naalakkersuisunut pingaaruteqarsimavoq. Pisassiissutinilli ikinnerusunik arfakkaanni pissutsit allaapput. Taamanikkussamut takussavarput. Pisarineqanngitsoortulli arajutsineqartanngillat.

Ambassadøri ilanngullugu oqarpoq Danmark Kalaallit Nunaallu isumaqatigiinniaqatigiittartut. Aleqa Hammond ukiortaami oqalungiaammini aamma erseqqissarpaa Kalaallit Nunaata arfanniarneq pillugu ataatsimiititaliarsuarmiiginnarnissaa pingaartillugu.

Naalakkersuisut arfattassanik 2013-mut aamma 2014-mut qaffaanerat uumassussilerisut inassutaannut assortuutinngillat.