Issi sinneqartoortitsilluarpoq
Nukissiorfiimmi 2011-mi 49,5 millionit koruuninik amigartooruteqarput, nunattali karsiata tapiissutai 74,7 millionit koruuniusut ilanngukkaanni taava 25,2 millionit koruuninik sinneqartooruteqarput.
Tassa ukioq 2010-mut isertitat aningaasartuutillu naleqqiutissangaanni Nukissiorfiit isertitaat 45,3 millionit koruuninik qaffariarsimapput, taama
Nukissiorfiit nalunaaruteqarput.
Innaallagissamut 2011-mi isertitat 78,8 millionit koruuninik amerleriarsimapput, tassalu ukioq taanna innaallagissamut akit qaffanneqarsimaneri tamatumunnga pissutaatinneqarput.
Kiassarnermut isertitat 25,2 millionit koruuninik amerleriarsimapput, tassalu 2011-mi ukiuunerata ississimanera tamatumunnga pissutaavoq.
Imermilli isertitat 7,2 millionit koruuninik ikileriarsimapput, erngullu akiisa allanngortinneqarneri 6 millionit koruuninik isertitakinnerulernermik pissutaatinneqarlutik.
Aamma uuliap 2011-mi akitsoriarsimanerata amigartooruteqarsimanermut pissutaaqataavoq, akerlianilli sulisunut akissarsiat aningaasartuutillu aaqqissuuteqinneqarneri ikileriarsimapput, atorfiimmi arlaqartut inuttalerneqqinneqaqqissimanngimmata.
Nukissiorfiit aningaasatigut ingerlatsilluarnerarput, silalli pissusaata allanngorarnera Nukissiorfiit isertitaanut sunniuteqartaqisoq unnerlugu. Tassa nunarput issikkaangat Nukissiorfiit isertitaqarnerulertarput, silali kiannerungaagat akerlianik isertitakinnerulersarnertik oqaatigalugu.
