Israelip siuttua Netanyahu peqquserluttuliortutut unnerluutigineqartoq

Israelip naalagaaffiata unnerluussisuata, Israelip ministeriunerugallagaa, 70-inik ukiulik Benjamin Netanyahu, akilerneqarluni peqquserluttuliorsimasutut, piginnaatitaanermik atornerluisimasutut peqquserluttuliorsimasutullu pasillugu unnerluutigaa.

Naalagaaffiup unnerluussisua ullumi taama nalunaaruteqarpoq.

- Naalagaaffiup unnerluussisuata ministeriunermik unnerluutiginnittariaqarnera pissutaalluni ullumi ulloq ilungersunarlunilu alianrpoq, naalagaaffiup unnerluussisua, tusagassiortunik katersortitsinermi oqartoq, CNN-ip allaaseraa.

Ministeriunerup peqquserlulluni iluanaarniarsimasutut suliani pingasuni unnerluutigineqarnissaa, naalagaaffiup unnerluussisuata Israelimi politiinut ukioq manna februaarimi innersuussutigaa.

AAMMA ATUARUK Netanyahu siammasissumik naalakkersuisoqatigiiliornissamut itigartinneqartoq

Netanyahu, inatsisinik unioqqutitsinikkut 264.000 dollarinik, tassa 1,8 millionit koruunit missaannik, suliffeqarfiutilinnit tunissuteqarfigineqarnini akuerisimagaa ilaatigut pasilliutigineqarpoq.

Netanyahu Israelimi sivisunerpaamik ministeriunerusimavoq. Taanna maannamut 2009-miilli ministeriunerulerpoq. Tamatumalu siornatigut 1996-imit 1999-imut ministeriunerusimalluni.

Netanyahu pisuutinneqassaguni ukiuni qulini parnaarussassanngortinneqarsinnaavoq. Nutaarsiassaqartitsivik Reuters taama allaaserisaqarpoq.

Benjamin Netanyahup nammineq oqarnera naapertorlugu tamanna naalakkersuisunik uppisitseriarneruvoq:

- Ilumoortoq ujartunngilaat, malersorpaannga, ministeriuneq, misissuisut pillugit taama oqarpoq.

/ritzau/Reuters