Isornartorsiuinerup kingorna: Partii namminersulernissamik anguniagalik ilisimatusartumit taperserneqartoq

Naalakkersuisut namminiilivinnissaq kinguartinniarsaraat.

Ataatsimiititaliap Naalakkersuisunut §21-mut suliakkiissutaata, Namminersorlutik Oqartussanut inatsimmi paragraf 21-ip inatsisitigut suliap ingerlarnga namminersulivinnissamut tikuussisoq, ukiup tulliani qulaajaanissaat akuerimmassuk, Naleraq taama isornartorsiuivoq. 

Suliap ingerlarnga tamakkiisumik nassuiarneqareersoq, taamaattumillu tamanna kinguarsarniarneqaannartoq Naleqqamit oqaatigineqarpoq. Partiip isornartorsiuinera Sermitsiami allaaserineqarsimavoq, aamma Naleqqap Inatsisartunut ilaasortaatitaa Kuno Fencker RADIO III-mut taamatut oqaaseqarpoq.

Maannalu Ulrik Pram Gadip, Dansk Institut for Internationale Studierimi ilisimatusartuunerup, Kalaallit Nunaata Danmarkimut nunarsuarmullu allanut attaveqarnerinik ilisimatusartoq, partiip isornartorsiuinera taperserpaa. Tamanna Radio IIII-mi "Morgen"-imi apersorneqarnerani pivoq:

- Isumaqarpunga Kuno Fenckerip ataatsimiititaliarsuup suliakkiissutaata ilisimaneqareernera pillugu oqarnera ilumoortoq.

Ataatsimiititaliarsuup sulinera katillugit 2 millionit koruuninik akeqassaaq. Aningaasalli taakku asuli atorneqartutut oqaatigissallugit suli siusippallaartoq, Ulrik Pram Gad isumaqarpoq.

- Paragraf 21-mi tunngaviusumik allaaserineqarpoq – aammattaaq namminersulernissaq pillugu isumaliutissiissummi 2008-meersumi oqaaseqaatit ilanngunneqarput – Kalaallit Nunaata namminersulivinnissaq pillugu Danmarki pisortatigoortumik qanoq isumaqatiginninniarfigisinnaaneraa. Taamaalillunilu tamanna aaqqiivigineqareerpoq, taanna nassuiaavoq.

Isumaqatiginninniarnermi inissisimaffissaq amigaataasoq

Kalaallit Nunaatali isumaqatiginninniarnermi inissisimaffini erseqqissumik oqaatigisariaqaraa namminersulivinnerullu piviusumik qanoq kinguneqarumaarnera paasineqaqqaartariaqartoq, Ulrik Pram Gadip erseqqissarpaa.

Taannali naapertorlugu  §21-mut ataatsimiititaliarsuaq naalakkersuisunit tamatuminnga qulaajaanissamut qinnuigineqarsimanngilaq.

- Ataatsimiititaliamut apeqqutiginneriaaseq aallaavigalugu, tunngaviusoq sammineqarnavianngilaq. 

- Inatsisitigut ingerlarnga tassani nassuiarneqartussaavoq. Taannalu erseqqikannerpoq, taanna oqarpoq erseqqissaatigalugulu Naleqqap naalakkersuisut namminersulivinnissamut ingerlanissamut periarfissamik ataatsimiititaliarsuaq atorlugu kinguarsaanerarlugit pasinninnerat, tunngavissaqartoq.  

Naalakkersuisut siulittaasuat Jens-Frederik Nielsen (Demokraatit) RADIO IIII-mit oqaaseqartinniarsarineqarpoq, sulili akineqanngilaq.