Islandip præsidentia sianilluannginnerarpaat
Qallunaat Nunaanni ministeriusimasut taakku TV2Newsimi apersorneqartillutik Islandip præsidentia taavaat "sianilluanngitsoq" aamma "nuannarineqarnissaannani eqqarsaatigigaa".
- Ataatsimut isigalugu Island siuariartoraluarpoq, tamannali Islandip præsidentiata sianilluanngitsup akornusersorpaa, Mogens Lykketoft ilaatigut taama oqarpoq, isumaqarlunilu præsidentip pisinnaatitaanini atornerlukkaa.
Præsident Olafur Ragnar Grimssonimut uparuaaneq pissuteqarpoq, Altingip inatsit akuersissutaa, Icesave præsidentip atsiorusussiamnngimmagu.
Altingip inatsit akuersissutigisaa præsidentip allanngortillugu taanna inuiaqatigiinnut taasissutigitippaa, taamaalillunilu Hollandimut aamma Skotlandimut akiitsut pillugit isumaqatigiissut Islandimiunit taasissutigitinneqarmat akiitsut 30 milliard koruuniusut, utertinneqarnissaat itigartitsissutigineqarluni.
- Islandimiut taamaa pissusilersornerisa assigiinnarpaa, Dronning Margrethep inatsimmik aalajangerneqareersumik nuannarinninnginnini pillugu inuiaqatigiinnut tamanna taasissutigilersaaleraluarpagu, Mogens Lykketoft oqarpoq.
Islandip præsidentia Danmarkimi tikeraaqqammersoq pillugu Uffe Ellemann Jensenip assuarliinera aamma Islandimi tusagassiorfiit issuarlugu allaaseraat.
Ilaatigut allaaserineqarluni Uffe Ellemann Jensen oqarsimasoq, præsidentip "nuannarineqarnissaannani eqqarsaatigigaa".
- Arraa, akiitsut akilerneqarnissaat pillugu taasisoqarmat, tamannalu naaggaarneqarluni, asuuna præsidentip tamanna nuannaarutigalugu inuiaqatigiit nersualaarai. Taamaaliornerani Islandimi demokratii akornusersorneqarpoq, Islandillu nunarsuarmi inissisimanissaa pitsaasoq akornusersorlugu, Ulle Ellemann Jensen oqarpoq.
Islandip præsidentiata, Islandimi nuannarineqaqisup assuarlerenerit oqaaseqarfigisimanngilai.