Islandimut pisariaqanngitsumik angalasoqaqqusinngitsoq – ima ilinnut sunniuteqarsinnaavoq
Nunanut allanut tunngasunut ministereqarfiup Islandimut pisariaqanngitsumik angalanerit tamarmik ullumimit nangaasaarutigilerpai.
Tamanna Islandip nunanit tamanit isaasunut coronavirus pissutigalugu killilersuinerminik sukannersitsineranik pissuteqarpoq.
Tamanna nunatsinnit Islandimukartunut aamma tunngassuteqartoq, Corona pillugu allattoqarfiup aqutsisua, Nels Ulrik Vinther paasissutissiivoq.
AAMMA ATUARUK Tamaat isigalugu: Coronavirus pillugu killiffik
Nunanut allanut tunngasunut ministereqarfiup Islandimut alangalanerit tamarmik nangaasaarutigippagit, taava inuit namminneerlutik angalanissartik pisariaqanngitsuunersoq nalilertussaavaat. Islandimut angalanissaq aamma inerteqqutigineqanngilaq – innersuussutaannaallunili, Nels Ulrik Vinther nassuiaavoq. Kisianni:
- Islandimut angalanaveersaartoqassaaq. Nunatsinnit Islandimi mittarfiit akornanni angalaniarneq ajornakusuunngaatsiarsinnaavoq, Nels Ulrik Vinther oqarpoq.
Mittarfiit akornanni bussertoqartartoq
Assersuutigalugu Tunumiit Islandimut angalagaanni Akureyrimi mittarfimmut tikittoqartarpoq. Islandimilu imaluunniit nunarsuup sinneranut ingerlaqqinnissamut – aqqusaaginnarnermiluuniit – busserluni mittarfimmut allamut timmisartup tullianukartoqartarpoq. Tamannalu ilungersunarseqqavoq.
Nels Ulrik Vinther nunatsinnit angalasunit ingerlaqqinneq ajuleqqasunit qassiiusunit ulluni kingullerni attavigineqarsimavoq.
- Nunatsinneersut Islandimi coronamut misissortinnissaat ajornakusoorpoq. Islandimmi nunarput tunillatsissimasoqanngitsutut isigaa, taamaammat angalaqqinnissamut itigartinneqartoqarluni, Nels Ulrik Vinther oqarpoq.
Island aqqusaarlugu angalasoqarnissaa pinaveersaarniarlugu Kulusuup Nerlerit Inaatalu akornanni timmisartukkut aqqummik nutaamik ullumi ammaasoqarpoq.
AAMMA ATUARUK Malittarisassat nutaat: Savalimmiunit nunatsinnut angalasunut killilersuisoqaqqilersoq
Ajoqaarlu, coronamimmi tunillatsissimannginnermut uppernaateqartigani nunatsinnut angalasoqaqqissinnaanngilaq.
Islandip tikittut tamarmik Islandimi ingerlaqqissagunik marloriarlutik misissortittarnissaat aalajangerpaa. Ataaseq tikinnermi ataaserlu tikinnermit ullut tallimat qaangiunneranni.
Islandimut angalasut tamarmik neriniartarfinnut, imerniartarfinnut, naluttarfinnut sumiiffinnullu allanut ornigunnaveersaassapput. Tamatuma saniatigut assersuutigalugu angalaatsiartoqaqqusaanngilaq, taamaallaallu biilinik sivikitsumik ingerlasoqarsinnaalluni.
Mattusimasoqartanngitsoq
Islandip killilersuinini maajip aallartinnerani qasukkarpai. Islandillu Europami Letlandimut tulliulluni unnuaanerani qitigiartarfinnut imerniartarfinnullu matunik maajip naanerani ammaalluni.
Islandimi coronavirusimik tuniluuttoqarnera nakkutigineqarsinnaasoq taamani nalunaarutigineqarpoq.
Islandimili tunillatsissimasut sapaatini-akunnerni kingullerni amerleqqipput.
Islandimit nunatsinnut angalaniartut aallannginnerminni ullut sisamat tallimat sioqqullugit misissortissapput. Misissortinnermilu tunillatsissimannginneq uppernarsarneqarsimappat nunatsinnut tikinnerup kingorna mattusimaqqaarnissaq misissorteqqinnissarlu piumasaqaataanani.