Islandimiut niuertarfiutaat Nuummi ammartoq
Nuummi pisiniarfimmi nutaami Bonus-imi pisiarineqarsinnaasut ilai tassaapput mamakujuit, aqerlortikkat, chipsillu Canadameersut Islandimeersullu. Pisiniarfik augustip 30-ani ammarneqarpoq, pisiniarfimmilu piginneqataasoq Poul Jensen ilanngukkaani qulinngiluanik sulisoqarluni. Pisiniarfik 600 kvadratmeternik angissuseqartoq suli nerisassanik ulikkaarneqanngilaq.
- Eqqissiivilluta ineriartortissavarput ukiup ataatsip ingerlanerani naatsorsuutigaarput pisiniarfiup immerluarsimanissaa. Siunertarivarput ulluinnarni inuit pisariaqartitaat amerlanerit pisiarineqarsinnaalerumaartut. Tamannali massakkut neqeroorutigisinnaanngikkallarparput, taama Poul Jensen oqarpoq.
Islandimi niuertarfiit Bonus-it Danmarkimi niuertarfinnut Netto-nut assersuunneqarsinnaapput. Islandimi niuertarfinni Bonus-it nioqqutissaatitik Islandimi akikinnerpaajutinniartarpaat, Nuummili niuertarfimmi Bonus-imi akigitinneqartussat allaanerussapput.
- Islandimi taamatut ingerlariaaseqarput, kisianni Kalaallit Nunaanni taamaaliornavianngilagut. Uanga aningaasaatikka kisiisa aallarniutigaakka, 500.000 koruunillu atorlugit aallarniitilluni unammillerujussuartoqarsinnaanngilaq, Poul Jensen nassuiaavoq.
Nuummi Bonus-imik piginnittut allaanerusunik nioqquteqarnissartik tunngavigalugu pisiniarfik ingerlanniarpaat, nioqqutissat Islandimeersut, Canadameersut, Amerikkameersullu nioqqutigineqassallutik. Nioqqutissat massakkut Pisiffimmi Brugsennimilu pisiarineqarsinnaanngitsut. Nerisassat asiunatik sivisuumik atasinnaasut pigineqassapput.
Nerisassat allaanerumaat tuniniarneri qanormita ingerlava?
- Pisiniartut assigiinngitsunik pisisarput. Mamakujuttut qillertuusanut naleqqiullugit pisiarineqanerupput. Massakkumut ingerlalluarpoq. Danmarkimiit mamakujuttunit pineqarsinnaasunit allaanerusut pigerusuppagut. Mamakujuttut allakkajaat, soorlu lakridsit qaavatigut sukkulaatallit, taama Poul Jensen oqarpoq.
Naak Nuummi Bonus-i Islandimi Bonus-ip pisiniarfiutaatut akikitsiginngikkaluartoq, Poul Jensenip sulissutiginiarpaa pisiniarfiutiminni nioqqutissat siunissami akikinnerulernissaat.
- Sapinngisamik akit pisisartutsinnut appasitsinniarnissaat anguniagaraarput, Poul Jensen oqarpoq.