Islandimiut filmiliaat takuteqqaarneqartoq
Islandimiu aalisartoq, Gudlaugur Fridthórsson, Gulli, marsimi 1984-imi angallatip inuttaaffigisami umiunerata kingorna nalunaaqquttap akunnerini arfinilinni imaani gradinik tallimaannarnik kiassusilimmi nalulluni imminut annattoq pillugu oqaluttuaavoq.
Nallerneqarsinnaanngitsumik iliornera filmiliaavoq alutornartoq, unneqqarissoq tiguartinnartorlu, naliliisartut arlallit taama allaaserisaqarput.
Marsip qaammataani 1985-imi unnukkut taarsuup ataani Gulli sapernartumik iliorpoq. Kilisaatip qassutaata immap naqqanut akkiunnerisigut kilisaateeraq kinnguvoq, Gullilu innutallu allat arfinillit kilisaammit anillattutuaapput.
Taakkunanngali Gulli annattutuaavoq. Taannami nerinnattuuvoq puisitullusooq orsoqarluarluni, taamaattumillu timaa nillulertupallanngilanngilaq. Pualanini, meeraanermini atuarfimmi qinngasaarutaasartoq annassutigivaa.
Gullip iliornera nallerneqarsinnaanngitsoq, Rigshospitalimi nakorsaaneq Michael Wanscher oqaluttuarpoq.
Inuit sivisuumik immami nillertumiissinnaanerat nalunngilarput. Akunnernili arfinilinni imaaniissimasinnaanera immikkuullarissuuvoq. Nalunaaquttap akunnerani ataasiinnarmi marlunniluunniit taamaaliorsinnaavoq. Orsoqarluartut nalinginnaasumik oqimaassusilinnut naleqqiullugit marloriaammik aniguisinnaassuseqarput, Michael Wanscher oqarpoq.
Aalisartoq islandimiu orsoqarluarnermi saniatigut aamma aniguerusussuseqarluarsimavoq. Taarsuup malissuillu ataanni, imaani gradinik tallimaannarnik kiassusilimmi silaannarlu gradinik pingasuinnarnik kiassuseqartoq Gulli nunap tungaanut nalunniarluni aalajangerpoq. Angallat kinngusimasoq ikinngutimilu ajunaartut tallimat timaat toqungatut qimallugit nunap tungaanut aallarpoq.
Gullip nuna anguaa. Iliuuserisaalu, 1984-imi Islandimi sapiitsuliortorsuanngussutigisaa maanna filmiliarineqarpoq, danskillu filminik naliliisartuinit alutorsaatigineqarluni.
Danmarkip Radioata naliliinermini ullorissanit arfinilinnit ullorissanik tallimanik tunivaa, filmilu "allaanerusutut alutornartutullu" taallugu.
Filminut pilerisaarut uani takusinnaavat:
