Islandimiit nunatsinnut angalanissat matuneqartut
Danmarkimi killeqarfiit arfininngornermi nalunaaqutaq ullup qeqqaniit matuneqassapput, tamanna ministeriunerup Mette Frederiksenip tallimanngornermi nalunaarutigaa. Tamatumunngalu atatillugu Islandimiit Nunatsinnut killeqarfiit aamma matuneqarput.
Politimestereqarfik tallimanngornermi taama nalunaaruteqarpoq.
Danmarkimiit killeqarfiit matuneqarnissaat pillugu ministeriunerup nalunaarutaa, Naalakkersuisuniit taperserneqarluartoq, Naalakkersuisut siulittaasuata, Kim Kielsenip ilisimatitsissutigaa.
Air Greenlandip Islandimiit nunatsinnut timmisartuussineri unitsinneqarniartut, Air Greenlandip Kalaallit Nunaanni Politiivinut paasissutissiissutigaa. Islandimiilli Nunatsinnut timmisartoq missagaluarpat, danskisut innuttaassusillit kisimik nunatsinnut isersinnaatitaassapput, nunanillu allani innuttaassusillit aatsaat immikkut akuersissuteqaqqaarlutik nunatsinnut iseqqusaassallutik.
Taamaattoq Islandimiit nunanillu allanit nassiussanik assartuussisoqarsinnaassaaq.
Killeqarfiit matuneqarnerini Kalaallit Nunaat, Danmarki, Savalimmiullu akornanni timmisartuussinernut eqquinngilaq. Tassa naalagaaffeqatigiinni nunat akornanni timmisartuussisoqarsinnaassaaq.
Naalakkersuisut aamma Nappaatit tunuluuttut pilugit ataatsimiititaliap siulittaasua, tusagassiortunik arfininngornermi, marsip ulluisa 14-ianni nalunaaqutaq ataatsimut katersuutitsissapput.
Coronavirusimut tunngatillugu killiffik sammineqassaaq.
Tusagassiortunik katersuutitsinissaq KNR TV-mi kanal 1 aamma kanal 2-kkut aallakaatinneqassaaq, saniatigut KNR-ip youtubemi kanaliatigut aamma malinnaasoqarsinnaassaaq.
