Timmisartuutileqatigiiffik nutaamik neqeroortoq: Islandimi unnuinertalimmik ukioru Kalaallit Nunaannukarsinnaavutit
Danmarkimi feeriareeruit angerlamut Islandimi unnueqqaarusuppit? Taamaappat taamaaliorsinnaanngungajalerputit.
Aviisi Jyllands-Posten taama allappoq.
Timmisartuutileqatigiiffimmi, Icelandair, Islandimi ullormi ataatsimi ullualunniluunniit unnuinertalimmik Københavnimiit nunatsinnut akitsuinngikkaluarluni ukioru timmisartuussisalissaaq.
- Akitsuinngikkaluarluta Kalaallit Nunaannut timmisartuussinerit Islandimut aqqusaarnertalersinnagatsigit nuannaarutigaarput. (…) Taamaammat ataatsimik billetsisilluni timmisartuussivinni marlunni angalalasinnaalernissaq nalunaarutigisinnaagatsigu nuannaarutigeqaarput, Icelandairip Europami timmisartuussinermik nittarsaasuisa pisortaat Hjalti Jónsson Jyllands-Postenimut oqarpoq.
Islandimi Keflavikip mittarfianiit Ilulissanut, Narsarsuarmut, Kulusummut Nuummullu timmisartuussisoqartarpoq.
Icelandair nunatta Danmarkillu akornanni angallavittaarsimalersuni kisiartaanngilaq. Air Greenlandimi iluatsitsiffiulereeqisumik Billundip Kangerlussuullu akornanni aasaq manna aamma timmisartuussisalerpoq.