Islandimi takornariat inissaqartikkumallugit sanaartortorsuupput
Reykjavikiinnarmi malinnaasinnaajumallutik maanna akunnittarfissuit nutaat aqqaneq-marluk sanaartorneqaraat, Politiken sisamanngornermi taama allaaserisaqarput.
Reykjavikimi takornariat nalliuteruttorfianni akunnittarfiit 92 procentimik ulikkaaqqasarput, ukiunilu marlunni kingullerni unnuisarfiit naammattarsimanngillat.
- Siorna takornariat 1 millionit maaniissimapput, kisitsisit 2020-mut anguniagaagaluarput, taamaattumik anguniagarput angoriikatapparput, sulilu amerliartorlutik. Taamaattumik iliuuseqapallattariaqarpugut amerlanernillu akunnittarfiliorluta, Inga Dora Gudmundsdottir oqarpoq, taanna Team Visit Reykjavikimi international Marketing & PR-manageriuvoq.
Nalinginnaasumik pinngortitaq Islandimi takorusunneqartarpoq, aammali takornarialerisut inuit Reykjavikimi sapaatip akunnerata naanersiornissaannik kajumissaartarpaat.
Takornariat aningaasartuutaat atorfissaqartinneqaqaat. Islandili 2008-mi aningaasarsiornikkut ajutoormat, nunami tassani qaqqeqqinniarsimapput, tamannalu takornariat akiliutaannik iluatsinneqarsimavoq, ullumikkummi aalisarnermit aningaasarsiutaaneruvoq.
Island ullutsinni nunanut pisuunerpaanut ilaalersimavoq, isertitat nunap inuttussusaa tunngavigalugu naatsorsoraanni. Tamannali uniffigiinnarsinnaanngilaat, nunanummi allanut akiitsorpassuit suli akilersorneqarput.
Takornariarpassuilli pinngortitamut nungullarsaataasinnaapput, taamaattumik naalakkersuisut ukioq manna siullermeerlutik aningaasaliipput ornigarneqarnerpaani pinngortitamut illersuusiorlutik.
- Suliniupput tunngavimmigut nungusaataanngitsumik ingerlanneqassaaq, ineriartorneq sukkavallaaqqunagu. Pinngortitami ornigarneqarnerpaat aningaasaliiffigineqarnissaat pisariaqarput, taamaattumik takornariat Islandimi sumiiffiit amerlanerit ornittalissagaat anguniarparput, Ingvar Örn Ingvarsson, Promote Icelandimeersoq oqarpoq.
