Island sinniisoqarfimmik Nuummi ammaavoq
Islandip nunanut allanut tunngasunut ministeria Gunnar Bragi Sveinsson, Naalakkersuisullu siulittaasuat Aleqa Hammond siuttoralugit sinniisoqarfimmik, imaluunniit generalkonsuleqarfimmik ammaasoqassaaq, Petur Asgeirssonilu generalkonsulit siullersarissavaat. Taanna Islandip nunanut allanut tunngasunut Reykjavikimi ministereqarfianeersuuvoq.
Islandip Nunatsinni sinniisoqarfissaa Nunatta biskoppiata Hans Egedep Aqqutaani allattoqarfigisimasaani inissisimassaaq, Namminersorlutik Oqartussat ungasinngigisaani inissisimassalluni.
Islandip sinniisoqarfissaata ammarneqarnerata saniatigut Islandimiut kalaallillu ataatsimoorlutik nalunaarutaat atsiorneqassasoq naatsorsuutigineqarpoq, Islandip Nunattalu akornanni suliassaqarfiit assigiinngitsut pillugit qaninnerusumik suleqatigiinnissaq siunniunneqarluni.
Generalkonsuleqarfiullu nutaap ammarneqarnissaa Aleqa Hammondip nuannaarutigaa:
- Islandip Nuummi generalkonsuleqarfimminik ammaanermini Kalaallit Nunaannut attaveqarneq qanoq pingaartitsigalugu takutimmagu nuannaarutigisorujussuuara. Nunat narluk akornanni ataqatigiinneq taanna illuatungeriinnit pingaartinneqarpoq. Suliassaqarfiit Islandip aamma Kalaallit Nunaata qaninnerujussuarmik suleqatigiinnissaannut periarfissaqarfiusut arlalippassuupput. Periarfissat taakkua ukiuni aggersuni ataatsimoorussamik iluaqutaasumik atorluassamaarlugit eqqarsaatigaara, Naalakkersuisut siulittaasuat Aleqa Hammond ilaatigut allappoq.
Sinniisoqarfissap suliassai amerlaqaat, assersuutigalugu Islandip naalagaaffiani innuttaassuseqartunut pasimik tunniussisarsinnaassalluni, soorlu aamma Islandimiutut innuttaassusillit soqutigisaannik illersuisassalluni.