Island: Kaupthingimi pisortaasimasut politiit tigussaraat

Taakku marluullutik aningaasanik peqquserluuteqarsimasutut pasineqarput.

Aningaaserivimmi pisortaasimasut taakku marluk ataasinngormat unnukkut Luxembourgimit, maanna najugaqarfigisaminnit, timmisartumik Reykjavikimut tikimmata tigusarineqarput.

Tamatumunnga peqatigitillugu nunani tamalaani politiit suleqatigiiffiata Interpolip nunanut tamalaanut nalunaarutigaa, siornatigut Kaupthingip siulersuisuini siulittaasuusimasoq Sigurdur Einarsson tigusarineqassasoq. Taanna Islandimi peqquserluuteqarsimasutut ujaarineqarpoq, maannali Londonimi najugaqarluni.

Kaupthingimi siornatigut atorfikkaajusimasut marluk sisamanngormat aamma tigusarineqarput.

Taakkununnga unnerluutiginnittoq Olafur Hauksson oqarpoq, aningaaserivinni pisortaasimasut tigusarineqarnerannut "aningaasanik peqquserluuteqarsimasutut" aamma "inatsisinik unioqqutitsisumik pappilissanik nalilinnik niueqateqartarsimasutut, aningaasanillu niuernermi inatsisinik unioqqutitsisarsimasutut" unnerluutigineqarnerat pissutaasoq.

Islandimi aningaaseriviit annerit pingasut Kaupthing, Landsbanki aamma Glitnir 2008-mi akiliisinnaajunnaarmata Islandip naalagaaffianit tiguneqarput.