Island Games silagissuugaa ammaanersiorneqarput
Island Gamesit 14-issaat silagissuugaa Isle of Wightimi illoqarfimmi Rydemi ingerlanneqarpoq. Ammaanersiornermi Tuluit Nunaat sinnerlugu OL-mi kultinnattuussimasoq Lord Sebastian Coe aaqqissuisunut siunnersortaasimasoq najuuppoq.
Island Gamesimi ammaanersiorneq illoqarfimmi Ryde-mi ingerlaaqatigiinnikkut pivoq. Aqquserngup sinaani pisuinnaat aqqutaanni nikorfaffiusinnaasut tamarmik atorneqarput timersortartunik saneqquasunik qiimmassaasunik.
Kalaallilli timersoriat ammaanersiornissaq sioqqullugu utaqqineq ippigaat. Tassami nalunaaquttap akunnerata aappaa affaq utaqqipput ingerlaaqatigiinerup aallartinnissaanut.
Qeqertat Island Gamesimi peqataasut aningaasarsiornikkut nunarsuarmi ajornartorsiorneq malugisimavaat.
- Taamaammat aningaasarsiornikkut ajornartorsiornq atuutereersoq pisariaqartippavut unammilligassat nutaat oqaluttuallu nuannersut, Island Gamesip kattuffiani siulittaasoq Jörgen Pettersson ammaanermi taama oqarpoq.
Maanna unammilligassat tassaalerput timersornikkut pisussat sapaatip akunnerani aggersumi timersortartut 3.500-ut sinnillit unammiuassammata.
- Unammisat tassaalersinnaavoq ikinngutit. Aamma ilungersortikkumaarpaatit suli sukataarnerulersillutit, Jörgen Pettersson oqarpoq.
Island Gamesip pisortatigoortumik ammarnera Lord Sebastian Coep nalunaarutigivaa.
- Isle of Wightimi najugallit angerlarsimaffitik uummatitillu ammarsimavaat unammersuarnerit ingerlassinnaaqqullugit. Neriuppunga tamanna ilassilluarumaarissi aammalu ilaatigut inuunerup sinnera atasussanik ikinngutigiinnerit pilerumaartut, Sebastian Coe oqarpoq.
Unammersuarnerit sapaammi aallartissapput. Nerrivimmi arsaarartartut aamma sulorartartut holdikkaarnermi unammissapput. Volleyballimi unamminerit aallarniutaasut aallartissapput kiisalu angutit arsaattartut Rhodosimut unammissallutik, unamminerlu taanna KNR radiokkut toqqaannartumik aallakaatinneqassaaq ullup qeqqaniit.
