Island Games ammaanersiorneqartoq

Island Games, Gibraltarimi ukioq manna pisussaq, arfininngornermi ammaanersiorneqarpoq.

Qeqertat 24-t timersuutini assigiinngitsuni 14-ini peqataassapput, unammeqataasussanilu 2000-it missaaniittuni 21-t nunatsinneersuupput. Timersortartut nunatsinneersut timersuutini sisamani peqataassapput, tassalu sulorarnermi, nerrivimmi arsaararnermi, atletikimi triathlonimilu unammeqataassallutik.

Aamma sikkilernermi nunatsinnit unammeqataasoqarnissaa pilersaarutaagaluarpoq, Christian Keldsenili seeqquarsimanini sivisuumik ajoqutigisimasani pissutigalugu pisinnaanani nalunaareerpoq.

Nunatsinneersunik sapaammi nunatsinni nalunaaqutaq qulinut qiteqquttoq unammisoqaqqaassaaq, tassani sulorarnermi gruppimi unamminerni siullermi Falklandsøernimut unammisoqassalluni.

Iligiikkuutaarluni sulorarnermi gruppimi unamminerit tamarmik sapaatiuppat naammassineqassapput, tassalu sulorartartut nunatsinneersut sapaammi pingasoriarlutik unammissallutik.

Sulorartartut nunatsinneersut Falkandsøernep saniatigut Orkneyp Qeqertaaneersunut Jerseyminngaanneersunullu unammissapput.

Aamma iligiikkuutaarluni nerrivimmi arsaararnermik gruppimi unamminerit sapaatiuppat pissapput. Tassanilu nunatsinneersut marloriarlutik unammissapput, siullermik Alderneymeersut tullianilu Savalimmiuneersut unammissallugit.

Island Games tallimannornermi juulip ulluisa aqqaneq-aappaanni naammassissapput.