Island Games aatsaat taama angitigissaaq

Qeqertarmiut unammiuaartarnerat Island Games assut soqutigineqaleriartorpoq. Unammiuaarnerit siullerpaamik 1987-imi Isle of Manimi ingerlanneqarmata peqataasut 700-uupput. Ukiormanna peqataasussat 3.000init amerlanerusussanngorput aatsaat taama amerlatigissallutik.

- Arsaalluni unammersuarnissaq peqataaffigineqarnerpaajussaaq tassani timersortartut 500-ut sinnillit peqataassammata unamminerillu 60-it ullut arfinillit ingerlaneranni ingerlanneqassapput, taama aasamut aaqqissuisussat Isle of Wightimeersut nalunaarput.

Ammaanersiorneq pissaaq junip 25-at tassanilu kalaallit 100-ut missaat peqataassapput timersuutini assigiinngitsuni tallimani unammeqataasussat.

Tuluit qeqertaat taanna tuluit qeqertai allat assigalugit arsaannermik nuannarisalerujussuarnik inoqarpoq. Ullut ilaanni unamminerit arsaaffinni arfineq pingasuni ingerlanneqartassapput taakkulu qeqertami tassani 140.000-it sinnerlugit inulimmi siammarsimapput.

Naggataarnersiorneq pissaaq julip aallaqqaataani.