Island: Amerlanerussuteqarluartut itigartitsipput
Inatsimmi tassani pineqarpoq, aningaasat qallunaat aningaasanngorlugit 30 milliardit koruuniusut Tuluit Nunaannut Hollandimullu utertinneqartussat.
Qinersisartut 60 procentii sinneqalaartut taasiartorput - tassa Islandimi qinersisoqartillugu qinersiartortartunit ikinnerulaartut.
Akuersisut 2.513-iupput itigartitsisullu 140.000-it missaanniillutik. Tamannalu ersarissumik nalunaarutiginninneruvoq.
Taasisitsinerup inernera maanna Islandimi naalakkersuisuusunut sunniuteqangaarnavianngilaq. Taamaattorli Tuluit Nunaannut Hollandimullu naafferartumik taarsersuinissamik isumaqatigiinniarnerit maanna ingerlanneqartut, isumaqatigiissummik maannamut anguneqartumit pitsaanerusumik inerneqanngippata, tamanna sunniuteqalersinnaavoq.
Islandimi ministeriunerup Jóhanna Sigurdardóttirip taasisitsineq sioqqulluguli siunertaqanngitsutut taavaa, taasisitsinermullu peqataaniarnani nalunaarluni. Taamaattorli qinersisartut quliugaangata arfinillit taasiartormata, taasisullu quliugaangata qulingiluat itigartitsimmata, taava tamanna maanna naalakkersuisuusut suliassamik isumaginninnerannik isornartorsiuinertut isigisariaqartoq, DR-ip ilanngutassiortua Niels Quale Reykjavikimit naliliivoq.
Taamaalilluni naalakkersuisut nutaamik pitsaanerusumillu piaartumik isumaqatigiissusiornissaq suliassarilerpaat, taamami pisoqanngippat naalakkersuisuuinnarnissartik naatsorsuutigisinnaassannginnamikku.
Taasisitsineq ippassaq naammasseriitsiaannartoq Islandimi aningaasaqarnermut ministerip Steingrímur J. Sigfússonip oqaatigaa, Islandip Tuluit Nunaannut Hollandimullu isumaqatigiinniarneri sapaatip akunnerata naanerata kinguninnguagut ingerlateqqinneqassasut.
Oqaatigalugulu aningaasaqarnermut ministeritut tunuarnialersaarani.
- Ingerlaqqittariaqarpugut, tassami nuna ajornartorsiuteqartorujussuuvoq, aamma naak massakkut pisut ilungersunaraluaqisut aaqqiiniartariaqaratta, Islandip aningaasaqarnermut ministeria taama erseqqissaavoq.
