Isiginnaartitsisartut pakatsipput
Nunatsinni isiginaartitsisartut ikittunnguupput, taamaattumillu inatsit atuutilerpat isiginnaartitsisartunik ilinniartoqalersinnaanermik periarfissiisussaalluni. Inatsisip kinguartinneqarnera isiginnaartitsisartumit Makka Kleistimit pakatsissutigineqarpoq.
- Isiginnaartitsisartoqatigiit Silamiut isiginnaartitsisartullu allat inatsissip atuutilernissaa sorsuutiginikuaat neriuuteqarsimallutillu, Makka Kleist oqarpoq nangillunilu:
Ukiuni kingullerni 25-ini isiginnaartitsisartuunermi inatsisissamik maleruagassaqarsimanani inatsisisamik siunnersuutip kinguartinneqarnera nukillaajallannarpoq.
Nunatsinni isiginnaartitsisartutut ilinniarsimasut ikittuinnaapput taamaattumillu inatsisip atuutilernissa tuaviuunneqartariaqarsorineqarpoq.
Isiginnaartitsinermut inatsisip atuutilerneratigut siunnersuutigineqarpoq, isiginnaartitisartoqatigiit Silamiut Nunatta isiginnaartitsisartoqatigiivisut sullississasut.
Makka Kleist oqarpoq, neriussimagaluarluni Namminersorneq atuutilerpat kulturi kinaassuseq eqqumiitsuliornerlu pimoorullugit qaffassartinniarneqassasut. Inuiaat kultureqanngitsut inuiattut ingerlasinnaanngillat, taamaattumik eqqumiitsuliortut isiginnaartitsisartullu pillugit inatsissap nukingiunneqarnissaa kissaatiginartinneqarpoq.
