Isiginnaartitsisartunngorniarfik aappaagu ammarneqalerpoq
- Taamatut ilinniarneq piumaavittariaqassavat. Imminut piukkuttariaqarputit. Qinnuteqartut tamarmik soorunami imminnut piukkuttussaapput, kisianni nalussanngilat taamatut ilinnialeruit imaanngitsorujusuussasoq, Nunatta Isiginnaartitsisartunngorniarfiani rektoriugallartoq Makka Kleist oqarpoq.
Qinnuteqarniat 18-ileereersimassapput, qaqugukkulluunniillu sulisariaqartarnissartik sillimaffigissallugu, soorlu aamma allamik suliffeqannginnissaq pingaartinneqartoq. Isiginnaartitsisartuuniaraannili inuttut inerisimalluartuunissaq aamma pingaaruteqarpoq, Makka Kleist oqarpoq, nangillunilu:
- Inuk inerisimalluartoq, nammineq nikorfasinnaasoq, isummersinnaalereersimasoq, piumasaqarfigineqarsinnaasoq, sukkasuumik eqqarsarsinnaaneq aamma ajoqutaanavianngilaq, Makka Kleist oqarpoq.
Peqqissuunissaq aamma pingaaruteqarpoq, isiginnaartitsisartuuniaraanni timikkut nukittuujusariaqarluni, Makka Kleist oqarpoq.
Isiginnaartitsisartunngorniarnerup ukiunik marlunnik sivisussuseqarnissaa siunniunneqarpoq, nunani allani ukiut sisamat tikillugit ilinniartoqartartoq, nunallu allat siunissaq qaninnerusoq eqqarsaatigalugu suleqatigineqarsinnaanissaat takorloorneqarluni. Isiginnaartitsisartunngorniat katillugit tallimat ataatsikkut ilinniartorineqarsinnaassapput.
Kalaallisut tuluttullu ilinniartitsisoqartassaaq, oqaluttuaativut, nunattalu oqaluttuarisaanera ilinniarnermi pingaartinneqassallutik. Nunallu assiginngitsut inoqqaavisa oqaluttuarisaanerat ilinniartitsissutigineqartassallutik.
Qinnuteqarniaraanni isiginnaartitsissummik Silamiukkunnut kingusinnerpaamik aappaagu januaarip tallimaani nassiussisoqassaaq, videonngorlugu nassiunneqassalluni.
Isiginnaartitsissutigineqartussaq assersuutigalugu Shakespearep isiginnaagassialiaanik Lady Macbethimik aallaaveqassaaq, kalaallisullu suliaassalluni.
- Kalaaleq arnaasoq isiginnaartitsissummi tassani takusinnaagaanni inuup taassuma torrallaavikkaa takusinnaassavarput. Isiginnaartitsissutigineqartulli suminngaanneeraluarpataluunniit takutissinnaasariaqarpavut, Nunatta Isiginnaartitsisartunngorniarfiani rektoriugallartoq Makka Kleist oqarpoq.
Qinnuteqartussanut paasissutissat kiisalu qinnuteqarneq siulleq, ilinniarfimmut qinnuteqarnermi naammassisassat katillutik pingasuupput, tassalu:
Monolog Erik Aappalaartoq, monolog Lady Macbeth kiisalu monolog Macbeth.
Qinnuteqartuni piukkunnartutut nalilerneqartut ingerlaqqissapput, februaarillu ingerlanerani qaaqquneqassallutik, tassanilu misilitsinnermi nutaami nalilerneqassallutik, ilinniartunngorsinnaanersullu nalilerneqassalluni.
