Isiginnaartitsisartoqatigiit Silamiut ullumikkut ukiunik 25-nngortorsiorput
Taanna isiginnaartitsinermik ilinniarfiuvoq, Jyllandip Kitaani Fjaltringimi angerlarsimaffeqartoq, 1975-imiillu kalaallinik inuusuttunik arlalissuarnik isiginnaartitsinermik erinarsornermik qitinnermillu ilinniartitsiviusimasoq.
Isiginnaartitsisartut Fjaltringimi ilinniarsimasut 1984-imi Nunatsinnut uterput, isiginnaartitsisartoqatigiillu Silamiut pilersillugit - tassa ullumikkut ukiut 25-t matuma siornagut.
Silamiut nalliuttorsiutigineqarnerat Nunatsinni tamarmi malunnartinneqassaaq.
Silamiut meeqqanut isiginnaartitsissusiaat Karius aamma Baktus Nuummi takuteqqaarneqassaaq, isiginnaartitsissusiaq taanna atuakkiortumit Norgemiumit Torbjørn Egnerimit atuakkiarineqarpoq, meeqqat kigutigissarnissaminnik ilikkarnissaat pillugu oqaluttualiaalluni.
Karius aamma Baktus pillugu isiginnaartitsissusiaq Nuummi kulturikkut illorsuarmi ullumi takuteqqaarneqassaaq ullunilu tulliuttuni marlunni isiginnaartitsissutigineqassalluni. Ukiup tulliani sinerissami isiginnaartitsissutigineqassaaq.
Silamiut isiginnaartitsissusiaat kingulleq - Tappavani inunnguaq taanna- eqqumiitsuliortup Frederik Kristensenip, Kunngip taalliai erinarsuusiaalu aallaavigalugit isiginnaartitsissusiaq unnugu KNR-TV-mi nalunaaqutaq arfineq pingasunut tanneq aqqanernut takutinneqassaaq.
Isiginnaartitsissusiami pingaarnertut isiginnaartitsissapput, Vivi Sørensen aamma Miki Fencker Thomsen.
Isiginnaartitsisartoqatigiit Silamiut nallittorsiornerannut atatillugu Tele-Post frimærkemik januaarimi saqqummersitsissaaq.
