Isertortumik paasiniaasartut PET nalunaarusiorput
Ukiuni kingullerni qulini misissuisut siulittaasuata, Leif Åmandip nalunaarusiaq tunniuppaa. Politikkikkut partiit suliniaqatigiiffiillu politiit isertortumik paasiniaasartuisa malinnaaffigalugillu nalunaarsortarsimasaat malittarisassat naapertorlugit ingerlanneqartarsimanersut nalilersorneqarsimapput. Nalunaarusiaq 4600-nik qupperneqarpoq, naalisakkamili hunnorujunik quppernilimmi naliliinerit, Danmarkip radioani ilanngutassiortup Jens Ringbergip qimerluualaarsimavai.
Jens Ringberg oqaluttuarpoq Politiit isertortumik paasiniaasartut malittarisassanik unioqqutitsisarsimanerannik pasinnissimanerigaluit ilaat tunngavissaqanngitsut. Politiillu malittarisassaasa ilaannaat inuiaqatigiinnit ilisimaneqarsimanerat tamassumunnga pisooqataasoq. Naluneqanngilarmi 1968-imi politiit malittarfisassaanni naaperttorlugit politikikut partiinut, katuffinnut aalajangersimasunut, arlaannulluunniit attuumassuteqarnerat pissutigalugu inuit nalunaarsorneqaqqusaanngitsut, maannakkulli paasinarsivoq aamma allamik politiit malittarisassaannut atatillugu allassimasoqartoq. Tassanilu allassimasut naapertorlugit politiit malittarisassanik unioqqutitsinerattut isigineqaraluartut naapaertuilluarneruinnarsimapput. 1968-ip kingorna Danmarkimi sivisunerusumik naalakkersuisuusarsimasut malittarisassaq taanna atorlugu inuit assigiinngitsut, soorlu talerperliuniat alapernaanneqarlutillu nalunaarsorneqartarnissaat aqqutissiuuneqarsimavoq. Politiit isertortumik paasiniaasartuisa suleriaasaannik nakutiginnittussaagaluit, Vambergip ataatsimiititaliaanik taaneqartartumi ilaasortat, taanna malitarisassanut ilangunneqarsimasoq nalusimavaat. Nakkutilliisussallu misissuileraangata pisortatigoortumik paasissutissat tunniunneqartarsimapput, taakkuali saniatigut nakkutilliisussanulluunniit isertuunneqartunik malittarisassaqarsimavoq. Soorunami politiit marloqiusatut ittumik suleriaaseqarsimanerat, soorlu isertuussanik nalunaarsuiffeqarsimanerat unioqqutitsineruvoq, saamerliuniallu alaatsinaanneqartarsimanerat unioqqutitsinerupput isornartorsiorneqartut. Suliaqaatigiiffiit assigiinngitsut alaatsinaanneqartarsimanerat, naluaarsuiffiisalu anngiortumik piniarneqartarsimanerat aamma isornartorsiorneqarpoq.
Danmarkip radioanit ilanngutassiaq Ulf Fleischerimit kalaallisuunngortinneqarpoq.
