Isertortumik isumaqatigiittut immiunneqarsimapput
Sanaartornermik suliffeqarfiit Polar Enterprisep aamma B.J. Enterprisep pisortaasa akunnerminni minutsini 30-ni oqaloqatigiillutik isumaqatigiinniarneri immiunneqarsimasut tusarnaarneqareermata, peqquserlulluni isumaqatigiinniartarnerit nunatsinni qanoq ingerlanneqartarnerat immiussap malunnarsisippaa.
Sisimiuni ilinniartunut inissialiortitsiniarluni 2009-mi sanasussarsiuussisoqarmat B.J. Enterprisep unammillertitik Polar Enterprise taama sunnerniarsarisimagaat immiussami paasinarsivoq.
B.J. Enterprisemi pisortap, John Kvistgaard Eliassenip Polar Enterprisep pisortaa taamani attaveqarfigaa, nunagissaasinnaanissaallu neqeroorutigalugu. Taassumunnga taarsiullugu Polar Enterprisep suliarinnittussarsiuussinermi akisunaarinninnissaat piumasaraa, B.J. Enterprisellu suliarinnittussarsiuussinermi pinngitsooratik ajugaasussanngortinneqassallutik.
Polar Enterprisep pisortaata, Lars Christian Madsenip ullumi eqqartuussivimmi nassuiaanera naapertorlugu B.J. Enterprisermiunit arlaleriarluni taamani attaveqarfigineqartarsimavoq, tassalu peqquserlullutik isumaqatigiinniarsarisarnerarlugit. Pissutsilli tamakku Lars Christian Madsenip ingasagileramigit Polar Enterprisep pisortaata oqarasuaatikkut oqaloqatigineqarneri kingulliit marluk immiunniarlugit aalajangiuppaa, tamanullu saqqummiunneqarnissai siunniullugit.
Immiussallumi tamarmik eqqartuussivimmi ullumi tusarnaarneqarput.
Immiussat aappaanni Lars Christian Madsenip suliarinnittussarsiuussinermi nammineq peqquserluuteqarani neqerooruteqarnialersaarnini John Kvistgaard Eliassenimut oqaatigaa, uffa John Kvistgaard Eliassenip B.J. Enterprisep sanaartugassamut neqerooruteqannginnissaa ilungersuutigigaluaraa, ima oqaqattaarpalulluni:
"Neqerooruteqarniaqinasi, imaluunniit akisunaarlugu neqeroorusiorniaritsi".
Pisoq unnerluutigineqartup nassuiaateqarfigigamiuk, Islandimiut sanaartornermik suliffeqarfiata Istak-ip sanaartornissamut akuliutinnginnissaa anguniarsarigaluarsimanerarpaa imalu oqaaseqarluni:
- Asuliinnaq oqaaseqartangaarama taanna akisussaaffigerusunngilara. Tassami kakkanniarnerinnaapput, John Kvistgaard Eliassen, Lars Christian Madsenimut oqaaserisimasani taama nassuiaateqarfigai.
Inatsisinik unioqqutitsilluni akinik isumaqatigiissuteqartarsimanerit pillugit eqqartuussinermi, B.J. Entreprise aqagu killisiorneqaqqissaaq, soorlu aamma Permagreen Grønland A/S kiisalu Kang-Total-Byg unnerluutigineqarnerminnut atatillugu killisiorneqassasut.
