Isertitsiviliortoqarpat orniginarnerulissaaq

- Qularinngilara taannartaa aaqqivigineqarpat ikigisassaanngitsut kommunefogedinngussallutik qinnuteqartalissasut, Jens Kristian Therkelsen naqissusiivoq.

Nunatsinni politiit naalagaaffiullu politiivi, rigspolitiet, kommunefogedit aningaasarsiaat amerlissallugit maannakkut misissuileruttorpaat. Kommunefoged nunaqarfimmi 100-it inorlugit inulimmi ukiumut 4.190 koruuninik ajunngitsorsiaqartarpoq 7.373 koruuninik 600-it sinnerlugit inulimmi ajunngitsorsiaqartarluni.

- Qularisassaanngilaq kommunefogedit aningaasarsiaat quleriaammik amerlineqarpata kommunefogedinngornissaq pilerinarninngorsinnaassasoq, Jens Kristian Therkelsen,  Ikerasak, nunaqarfiit aqutsisuisa  peqatigiiffianni siulittaasoq oqarpoq.

- Imaanngilarli aningaasarsiassaat amerlineqarpata nunaqarfimmiut amerlarnersaasa kommunefogedinngornissartik pileritsaatissagaat, Jens Kristian Therkelsen, nunaqarfiit Ikerasak, Saattut Ukkusissallu siulersuisuisa siulittaasuat erseqqissaavoq. Nunaqarfiit kingulliit pineqartut sivisuumik kommunefogedeqarsimanngillat. Saattut 215-it missaanni inoqarput Ukkusissat 85-it missaanni inoqarlutik.

- Kommunefogediuneruna nakerineqarneq ajortoq kiserliornarsinnaasarmat, Jens Kristian Therkelsen oqarpoq, erseqqissaallunilu imaanngitsoq aningaasarsiaat amerlineqarpata kommunefogedeqartitsiniartarnerujussuaq anigorneqassasoq,

- Kommunefogedinut atugassarititaasut pitsaanerpaanngillat. Sumiiffiit amerlanersaanni inatsisaatsuliorsimasut kommunefogedit angerlarsimaffiini paarineqartarput isertitsiveqanngimmat, Jens Kristian Therkelsen oqarpoq.  

Nunaqarfiit 13-it maannakkut kommunefogedeqanngillat, taakkununngalu ikiorteqartoqaratik. Kommunefogedinut atorfiit 58-iupput 32-llu ikiortitut atorfiullutik.