Isaksenip Kujallermi suleqatigiinnissaq kissaatigaa
Siumut nuna tamakkerlugu isigigaanni kinguariarpoq, Kommune Kujallermili siuariarluni.
Kiista P. Isaksen kommunimi qinigaanerpaavoq. Borgmesterinngussagunilu kommunalbestyrelsemi partiinik allanik suleqateqarnissani kissaatigaa.
Siumumeersoq Kiista P. Isaksen Teknikkimut Avatangiisinullu Ataatsimiititaliami maannamut siulittaasuusoq, 450-init taaguunneqarpoq. Partiimilu qinerneqarnerpaammat borgmesterinngornissaa ilimanarluinnarpoq.
AAMMA ATUARUK Arnat pissaanermik tigusinissaminnut piareertut
- Qinikkatut sulininni tapersersorneqarnera misigisorujussuunikuugakku qularutiginikuunngilara qinigaaqqinnissara, kisianni taamak amerlatigisunit taaguunneqarnera tuppallernarpoq nuannersumillu tupaallannarluni, Kiista P. Isaksen oqarpoq.
Borgmesteri kinguariarpoq
Maanna borgmesteriusoq, Jørgen Wæver Johansen, qinersinermi kingullermi 292-init taaguunneqartoq, 212-init maanna taaguunneqarpoq.
Parteeqataalu, KANUKOKA-mi siulittaasoq, Simon Simonsen, 266-init taaguunneqarluni borgmesterimit aamma qinerneqarneruvoq.
2001: Narsami kommunalbestyrelsimut qinigaavoq
2001-05: Nunatsinni Naligiissitaanermut Siunnersuisoqatigiinnut ilaasortaq; Inatsisartuni sinniisissaq siulleq
2005-07: Kujataani kommunit kattuffiani siulittaasoq KANUKOKA-milu siulersuisunut ilaasortaq
2005-09: Narsap Kommuniani borgmesteri
2008: Siumut siulersuisuani siulittaasup tullersortaata aappaa
2009-11: Narsami isumaginninnermut siunnersortinut aqutsisoq
2009-13: Kommune Kujallermi borgmesterip tullersortaa
2011-14: Kommuni Kujallermi isumaginnittoqarfimmut fagchefi
2015: Kommune Kujallermi inissinneqarsimasunut siunnersorti avataaneersoq
2016-17: Teknikkimut Avatangiisinullu Ataatsimiititaliami siulittaasoq
Paasissutissat: FIU-ligestilling.dk
AAMMA ATUARUK Qinersinermi ajugaasut aaku
Siumut Kommune Kujallermi kommunalbestyrelsemi amerlanerussuteqaraluartoq, Kiista P. Isaksenip partiinik allanik suleqateqarnissaq kissaatigaa.
- Taamaattariaqavippoq, innuttaasut sullitagut taakkuupput aamma uagut qinikkat innuttaasut sullittussaavagut, Kiista P. Isaksen oqarpoq, erseqqissaatigalugulu parteeqataasa allanik suleqateqassanerluti aamma aalajangiiffigeqataasussaagaat.
Partiit agguataarnerat allanngunngilaq
Kommuninut kingullermik qinersisoqarmat Siumup, Inuit Ataqatigiit Atassullu suleqatigilerpai, suleqatigiinnerli kingorna ajalusoorluni.
Partiit qinigaatitaasa maanna agguataarnerat, kingullermik qinersinermut naleqqiullugu taamaaginnassasut, KNR-ip naatsorsuinerata takutippaa.
Tassa imaappoq: Siumut qulingiluanik qinigaatitaqassaaq, Inuit Ataqatigiit tallimat, Atassullu ataatsimik qinigaatitaqassalluni.
Kiista P. Isaksenip kommunalpolitikkimik sulineq ukiunik 16-inik misilittagaqarfigaa Narsamilu borgmesteriunikuulluni.
