Iranip præsidentia nunanullu allanut tunngasunut ministeri qulimiguulik nakkarmat ajunaartut
Præsidentip nunanullu allanut tunngasunut ministerip ajunaarsimanerat, atorfilittat ilaata atiminik tunniusserusunngitsup ilisimatitsissutigaa. Nutaarsiassaqartitsivik Reuters ataasinngornermi ullaakkut taama ilisimatitsivoq.
Mohsen Mansourip, Iranimi præsidentimut tullersortit ilaata præsidentip ajunaarsimanera inoqatinut attaveqaqatigiittarfikkut X-ikkut uppernarsarpaa.
Ajunaartoqarsimanera Iranimi naalagaaffiup tv-qarfiata aamma uppernarsarpaa. Nutaarsiassaqartitsivik Reuters taama allaaserisaqarpoq.
Qulimiguullit nakkarmata issimasut ajunaarsimanissaat unnuap ingerlanerani aarleqqutigineqalereerpoq.
- Præsidentip Raisip qulimiguuliutaa nakkarmat nunguilluni ikuallappoq. Issimasut ajunaarsimanissaat aarleqqutigineqarpoq, nalunaarummi allassimavoq.
Qulimiguullit nakkarnerannut pissutaasinnaasut suli ilisimaneqanngillat.
Killeqarfiup nalaanut tikeraareernermi nakkartut
Qulimiguullit atorlugit Iranip Aserbajdsjanimut killeqarfiata nalaanut tikeraareernermi utilermata nakkarput. Qulimiguullit marluk allat aamma angalaqataapput.
Iranimi nunap immikkoortuani Østaserbjdsjanimi qaqqartuumi silapilunnerata nalaani ajutoortoqarpoq.
Præsidentip qulimiguuliutai nakkarput, qulimiguullillu marluk allat apuuffissaminnut isumannaatsumik apuullutik.
Inuit qasserpiaat præsidentip qulimiguuliutaannut ilaanersut ilisimaneqanngilaq.
Annaassiniartartut qulimiguullit nakkarfiata nalaanut unnuaq anngupput.
63-inik ukiulik Ebrahim Raisi Iranimi 2021-mili præsidentiuvoq.
Raisi politikeritut qanganisalerituutut, tassa konservatiivitut isigineqarpoq, Iranip qullersaanut ayatollah Ali Khameneimut qanimut suleqateqartutut isigineqarluni.
Khameneimut kingoraartissatut siusinnerusukkut aamma isigineqarpoq.
Iranimi ileqqorissaarnissaq pillugu inatsisit sukateriffigineqarmata nunami tassani akerliussutsimik takutitsinerpassuaqarpoq, akerliussutsiminnillu takutitsisut Raisip præsidentiunerata nalaani sukannersumik iliuuseqarfigineqarlutik.
