Irakimi akerliussutsimik takutitsisoqarnerani 6000-it ikilerneqartut 100-llu toqutaasut
Irakimi akerliussutimik sakkortuumik takutitsisoqarnerani 100-nit amerlanerusut toqutaanerisa tusindillillu ikilerneqarnerisa kingunerisaanik nutaamik aaqqissuussisoqaqqinnissaanik Irakip ministeriunera, Adel Abdel Mahdi sapaatiummat neriorsuivoq.
Irakimi nunamut namminermut ministereqarfiup oqaaseqartartuata piitsuunermut ileqqorlunnermullu tunngatillugu akerliussutsimik takutitsineranni ikinnerpaamik 104-t toqutaasimanerarpai.
Tamatuma saniatigut sakkutuunut politiinullu aporaannermi 6000-init amerlanerusut ikilerneqarput. Taassuma pisortat illorsui najugaqarfiillu arfineq-pingasut akerliussutsimik takutitsisunit ikuallanneqarsimasut aamma oqaatigaa.
AAMMA ATUARUK Irakimi akerliusut akornanni toqutaasut amerliartortut
Irakimi isumannaallisaanermi sakkutuut arfineq-pingasut toqutaasut ilagaat. Oqaaseqartartup oqarnera naapertorlugu naak akerliussutsimik takutitsisut akerliusunut aallaasoqartarneraraluaraat Irakimi sakkutuut akerliusut tungaannut toqqaannartumik eqqarsimanngillat.
Piitsuunerpaanut ineqarnermut tapiissuteqalernissaa, suliffissaaleqisut taperserneqarnissaat inuusuttunullu suliffissaaleqisunut atortitsinissaq Irakimi ministeriunerup neriorsuutaani ilaapput. Tamatuma saniatigut Irakimi inissianik nutaanik 100.000-inik sanaartortoqassaaq.
Toqutaasullu imminut pilliutigalutik akerliusimasutut oqaatigineqassasut Mahdip aamma neriorsuutigaa. Toqutaasimasullu ilaqutaat taarsiiffigineqarnissamik piumasaqarsinnaassapput.
Ikerlerneqarsimasut nakorsarneqarnerat aamma nunami allami nakorsarneqassagaluarunik tamanna Irakimi naalagaaffiup akilissavaa. Nutaarsisassaqartitsivik dpa taama allaaserisaqarpoq.
Akerliussutsimik takutitsisut ileqqorluttoqarneranik kamaateqarput. Taakkulu isumaqarlutik Irakimi naalakkersuisut ileqqorluttoqarneranik pinaveersaartitsisimanngitsut.
/Ritzau/