Iqalunnimi pisortat illuini tappiitsut naqinnerinik pilersuisoqalersoq
Nunavuup sinnerani pisortat illuutaanni taamaaliortoqartalernissaa taassuma saniatigut innersuussutigaat, Iqalunni mittarfittaassami ukioq manna ammartussatut naatsorsuutigineqartumi aallartittoqassalluni.
CBC Northip nittartagaani tamanna atuarneqarsinnaavoq.
Iqalunni pisortat illuutaasa tappiitsunut isigiarsuttunullu naqinnernik pilersorneqarnissaat innarluutillit pillugit Iqalunni ataatsimiititaliap innersuussutigaa, Iqalunnilu kommunalbestyrelsip siorna kingullermik ataatsimiinnerani tamakkiisumik tapersersorneqarpoq.
- Suliffeqarfiit akuersissutinik siunissami qinnuteqaraangamik innersuussutigisarniarparput malittarisassanut nutaanut malinnittassasut, tappiitsut isigiarsuttullu matumani sullinneqarluarnerulernissaat siunertaalluni, Jason Rochon, Iqalunni kommunalbestyrelsimeersoq oqarpoq.
27-nik ukiulik Mike Stopka, USA-mit Canadamut nunasivoq, nulianilu Iqalunni ukiuni kingullerni sisamani najugaqarlutik. Stopka tappiitsuuvoq, soorlu aamma nulia tappiitsuusoq.
Iqalunni tappiitsut isigiarsuttullu sullilluarneqarniarnerat taassuma nuannaarutigaa, suliarli aatsaat aallartinnerarlugu. Suliffeqarfiit namminersortut suliniutinut ilaasariaqartut taanna isumaqarpoq, namminersortut suliffeqarfiutaasa tappiitsunut isigiarsuttunullu naqinnilersorneqarnissaat kissaatigalugu.