IPK: Politikkikkut tapersersorneqarneq ajunngilaq
Kattuffiup siulittaasoriligaa, Sisimiormiu 67-nik ukiulik, Marie Nielsen oqarpoq, politikerit piumassuseqarluarlutik tapersersuineri pingaartutut isigalugu.
- Kattuffiup aallarteqqinneqarnera pingaarnerpaavoq. Pisortaniillu suleqatigiinninniarneq assorujussuaq isumalluarnarluni, Marie Nielsen oqarpoq.
Taassumali siulittaasutut ivertinneqannginnerani, kattuffiup uummarsaqqinneqarnissaanik suliniuteqarluartut ilaat, Sisimiormiu Buster Berthelsen, kattufimmi siulittaasunngoraluarluni tunuarpoq, politikerit akulerunnerat nuannarinagu tunuarnerminut tunngavilersuutigalugu.
Tunuarninilu Buster Berthelsenip nassuiarpaa:
- Taama ataatsimeersuarneq naleqartigisoq, sinerissamiillu takkuttut taama amerlatigisut akuersaarneqarsinnaanngippata uanga inuunerma sinnerani Naalakkersuisut akuersitinniarsaralugit qimuttoorusunngilanga. Naalakkersuisut piumasaat ullormiit ullormut allanngorartut suliariuassavaguut? Tamanna akuersaarsinnaanagu tunuarniuteqarpunga, tassami ineqartut sullinneqarnissaat uanga salliutikkakku ineqartullu isumaat tunngavigalugu sulerusukkaluarama, Buster Berthelsen taama tunngavilersuivoq.
Ineqartut Peqatigiiffiisa Kattuffianni siulersuisuunernut ilaasortanngortup, Nuummiup Vittus Nielsenip siulittaasunngoraluartup tunuarnera ima oqaaseqarfigaa.
- Radioaviisikkut isummernera akuleruffiginianngilara. Ataatsimeersuaqataasut tamarmik tunuarniuteqarnera akueraat. Tamannalu ataqqineqartariaqarpoq, Vittus Nielsen oqarpoq, taassuma siulersuisoqataasalu politikerit akulerunnerannik oqalunneq ulorianarsinnaasutut isiginngilaat.
- Politikkikkut akulerunneq ulorianartutut isumaqarfiginngilara, tassami Namminersornerullutik Oqartussat kommunillu piginnittuupput. Taamaattumik qanimut suleqatiginissaat ulorianartutut isigisariaqanngilaq, ingammik aningaasatigut ikiuunnissaat piviusunngussappat. Naqisimanninniarpalaartumik politikerit pissusilersulissappata nakkaannarfiginavianngilagut, Vittus Nielsen oqarpoq.
Nunatsinni inissiani attartortakkani ineqartut 9.300-it missaanniipput. Taakkunannga 50-it missaanniittut kattuffiup ataatsimeersuannginnerani ilaasortanngorsimapput. Tamannarpiarlu tunngavigalugu kattuffiup siulittaasuata, Marie Nielsen-ip oqaatigaa, kattufiiup aallartisarneqarnerani politikkikkut tapersersorneqarneq pisariaqartoq. Politikerinillu aqunneqannginnissaq pineqassappat ineqartut ilaasortaasariaqarneri siulittaasut ujartorpaa.
- Politikerinit killilersorneqarneq pinngitsoorniassagutsigu, ineqartut amerlanerpaat ilaasortanngortariaqarput. Taamaalilluni kattuffik ingerlalluartoq angussagaluaratsigu, Marie Nielsen taama oqarpoq.
Taassuma saniatigut siulersuisuunerni qinigaapput:
Bolethe Bech Bendtsen, Qaqortoq, siulittaasup tullia
Nikoline Lundblad , Sisimiut, aningaaserisoq
Siulersuisunut ilaasortat:
Marius Dalager, Ilulissat
Vittus Nielsen, Nuuk
