IPK-mik pilersitseqqittoq: Politikkikkut akuliussimaneqarpoq

Buster Berthelsen ullut marluinnaat siulittaasooreerluni aalajangerpoq, siulittaasuunerminit tunuarniarluni, Ineqarnermut Naalakkersusioq, Jens B. Frederiksen politikkikkut akuliunnerarlugu isumaqarami.

Buster Berthelsen ima tunngavilersuivoq.

- Kiffaanngissusiiagaaniartugut, taavalu Naalakkersuisut isumaannut tusarnaaginnartussanngorluta inissinniarneqartugut, tassa uanga taamatut isumaqarpunga. Ineqartut isumaat tusaaneqanngilaq, Jens B. Frederiksenilli isumaanut tusarnaaginnartussatut isigineqarluta, Buster Berthelsen oqarpoq.

Politikkikkut akuliunnerunngitsoq, Ineqarnermut Naalaakkersuisup, Jens B. Frederiksenip oqaatigaa. IPK-p aallartisarneqarnerani inissiani attartortut 50-iinnaat maannanmut ilaasortanngorsimaneri tunngavigalugit aningaasanik ikiorsiisoqarsinnaanngitsoq, Jens B. Frederiksenip oqaatigaa. Taassuma oqaatigaa IPK-mut ilaasortaasut amerlasuunngorpata aatsaat aningaasanik tapiisoqarsinnaasoq.

Ineqartut Peqatigiiffiisa Kattuffiannut akuleruttoqanngitsoq, Ineqarnermut Naalakkersuisoq, Jens B. Frederiksen oqarpoq nangillunilu ima oqarluni.

- Aningaasanut Inatsisissamit aningaasanik immikkoortitsinikuuvugut. Aningaasallu taakku aatsaat tunniunneqarsinnaapput, ineqartut sinnerlugit oqaluttoqassappat. Tamassuma saniatigut kattuffik ineqarnermut maalaartarfimmi issiatitaqarsinnaapput. Issiavillu taanna tunniunneqarsinnaavoq aatsaat ineqartut sullinneqarneri naammassineqarpata,Ineqarnermut Naalakkersuisoq, Jens B. Frederiksen oqarpoq.

Peqatigiiffimmik suliniuteqartup, Buster Berthelsen politikerinut qimuttutut isigineqarusunnani siulittaasuunerminit tunuarnini tunngavilersuutigaa.

- Taama ataatsimeersuarneq naleqartigisoq, sinerissamiillu takkuttut taama amerlatigisut akuersaarneqarsinnaanngippata uanga inuunerma sinnerani Naalakkersuisut akuersitinniarsaralugit qimuttoorusunngilanga. Naalakkersuisut piumasaat ullormiit ullormut allanngorartut suliariuassavaguut?

Tamanna akuersaarsinnaanagu tunuariuteqarpunga, tassami ineqartut sullinneqarnissaat uanga salliutikkakku ineqartullu isumaat tunngavigalugu sulerusukkaluarama.

Inissiani attartortittakkani, Ineqartut Peqatigiiffiisa Kattuffiata aallartisarneqanerani, qaammatinilu kingullerni quligiluani suleqataasoq, Buster Berthelsen taama oqarpoq.

IPK-p aallartissarneqarnerani ataatsimiinneq, sapaatip akunnerata uuma naanerani pisoq, Ineqarnermut Naalakkersuisumit aqunniarneqarsimasoq, Buster Berthelsenip oqaatigaa.

Taama pisoqarsimanmngitsoq Naalakkersuisup Jens B. Frederiksenip oqaatigaa.