iPhonet naalakkersuisunit nuannarineqaqaat
Naalakkersuisut ikinnerpaamik sisamat atorfimminnut atatillugu oqarasuaammik Iphonemik peqarput, tassaappullu Ove Karl Berthelsen, Mimi Karlsen, Jens B. Frederiksen aamma Maliina Abelsen.
iPhone smartphonetut aamma taaguuteqarpoq, skærmia oqarasuaatinut angallattakkanut allanut naleqqiullugu anneruvoq, allanniarlunilu naqitassai emailimik allannissamut naleqqulluinnarlutik.
iPhoneli oqarasuaammut angallattakkamut allamut naleqqiullugu akisuneroqaaq. Inunnik isumaginninnermut naalakkersuisoq Maliina Abelsen novembarimi nutaamik oqarasuaatitaarami 1800 koruuninik akisuneruvoq.
Oqarasuaatip puua akitsuutillu ilanngullugit katillugit 6550 koruuneqarpoq, oqarasuaatinilu iPhone atorlugu internetsimut isersinnaanissani isumaginninnermut naalakkersuisup Maliina Abelsenip pingaartippaa:
- Oqaraasuaat atorlugu internetimut isersinnaanissaq pisariaqartippara, suliinnaavippungami. Attavigineqarsinnaajuarpunga, ilaquttakkalu aperigukkit akissavaatsit oqarasuaammik angallattakkamik nalinginnaasumik peqartariaqaraluartunga, Maliina Abelsen oqarpoq.
Taanna aamma oqarpoq ullorsiutit alakkarsinnaajuartariaqarlugit, assersuutigalugu mittarfimmi utaqqitilluni taamaaliorsinnaalluni.
Anthon Frederiksen, Ane Hansen aamma Palle Christiansen oqarasuaammik angallattakkamik nalinginnaasumik peqarput.
Kuupik Kleistip aamma Agathe Fontainip oqarasuaatit angallattakkat sorliit atorneraat paasiniaraluaratsigu iluatsinngilarput.