IOC-p aasaanerani OL-ertoqarnissaanik kinguartitsisoqarnera uppernarsaraa
Japanimi ministeriunerlu Shinzo Abe, aasaanerani OL-ertoqarnissaata 2021-mut kinguartinneqarnissaa pillugu isumaqatigiissimallutik, nunat tamalaat OL-imut ataatsimiititaliaata (IOC) præsidentiata, Thomas Bachip, IOC-ip nittartagaani uppernarsarpaa.
Aasaanerani OL-ertoqarnissaa kingusinnerpaamik 2021-imi aasamut kinguartinneqassasoq isumaqatigiissutigaat.
Thomas Bachip Japanimi ministeriuneq Shinzo Abe oqarasuaatikkut marlunngornermi ataatsimeeqatigaa, Shinzo Abellu aasaanerani OL-ertoqarnissaata coronavirusimik nappaalasoqarnera pissutigalugu kinguartinneqarnissaa ataatsimiinnerminni qinnutigaa.
AAMMA ATUARUK OL-ertoqarneranik aaqqissuussisuusimasoq: Tokyomi OL-ertoqarnissaa kinguartinneqarli
Tokyomi 2020-imi aasaanerani OL-ertoqarnissaanik aaqqissuussisut ataatsimiititaliaata præsidentia Mori Yoshiro, Japanimi OL-imut ministeri Hashimoto Seiki, Tokyomi guvernøri Koike Yuriko, IOC-ip ataqatigiissaarisuisa ataatsimiititaliaanni siulittasoq John Coates, IOC-imi generaldirektøri Christophe De Kepper IOC-illu OL-imut pisortaa Christophe Dubi oqarasuaatikkut ataatsimeeqataapput.
- Aasaanerani OL-ertoqarnissaa ukiup ataatsip missaanik kinguartinneqassasoq siunnersuutigaara, præsident Bachillu siunnersuutiga tamakkiisumik tapersernerarpaa. Nutaarsiassaqartitsivik AFP naapertorlugu Shinzo Abe ataatsimeereernermi taama oqarpoq.
IOC-ilu taama isumaqatigiittoqarsimaneranik uppernarsaavoq.
- IOC-ip præsidentia Japanimilu ministeriuneq nalaatavut WHO-llu paasissutissat marlunngornermi saqqummiussai kingulliit tunngavigalugit Tokyomi aasaanerani OL-ertoqarnissaa kingusinnerpaamik 2021-mi aasamut kinguartinneqassasoq aalajangerpaat. IOC nittartakkamini taama allappoq.