OL-ertoqarneranik aaqqissuussisuusimasoq: Tokyomi OL-ertoqarnissaa kinguartinneqarli
Tokyomi ukioq manna OL-ertoqarnissaa kinguartinneqarli.
Aasaanerani kingullermik OL-ertoqarneranik aaqqissuussisoq Brasilia, Rio de Janeiromi aasaanerani 2016-imi OL-imik aaqqissuussisuusoq, taama oqarpoq.
Brasiliami OL-imut ataatsimiititaliarsuaq isumaqarpoq, Tokyomi OL-ernissaq ukioq manna aggustimi pisussatut pilersaarutigineqartoq, coronavirusip nunani tamalaani tuniluutilernera pissutigalugu ukiumik ataatsimik kinguartinneqartariaqartoq.
Timersortartut OL-imut piareersarnerisa ilaatigut ajornakusoortinneqarnera pissutaanerarpaat.
Tokyomi OL-ertoqarnissaata kinguartinneqanngikkuni taamaatiinnarneqarnissaa, nunat tamalaat OL-imut ataatsimiititaliaata IOC-p maannamut siunnersuutigisimanngilaa, julillu ulluisa 24-anni aallartittussatut suli pilersaarusiorluni.
Timersortartut amerlasuut, timersoqatigiit arlallit nunallu ataasiakkaat OL-imut ataatsimiititaliaat, Norge, Frankrig, Tyskland USA-lu taakkununnga ilaallutik, isornartorsiuisunut ilaapput.
Canadap OL-imut ataatsimiititaliaata, COC-p, timersortartutik aasaru Tokyoliartinnianngilaat, coronavirusip tuniluutilertornissaa ernummatigigamikku.
OL-ip coronavirusip tuniluutilertornera pissutigalugu kinguartinneqarnissaa, Danmarkimi Timersoqatigiit Kattuffiata DIF-ip siulittaasuata Niels Nygaardip kaammattuutigaa. Timersortartut nunarsuarmioqatigiillu isumannaatsuunissaat pillugu taamaaliortoqartariaqartoq, taanna oqarpoq.