IOC: Coronaqaraluarpalluunniit aappaagu OL-ertoqassaaq

Coronavirusip nunarsuaq tamakkerlugu tunillaassuunnera qanorluunniit ikkaluarpat, Tokyomi aappaagu OL-ertoqassaaq.

Nunat tamalaat OL-imut ataatsimiititaliaata (IOC-p) præsidentimut tullersortaa, John Coates, AFP-mut ataasinngormat oqarpoq.

OL-imi unamminerit sorsunnersuaq siulleq aappaalu eqqaassanngikkaanni taamaatiinnarneqarsimanngisaannarput, taamaaginnassasorlu, John Coates aalajangiusimalluni oqarpoq.

- Covid-19-eqaraluartorluunniit ingerlanneqassapput. OL-imi unamminerit aappaagu juulip ulluisa 23-anni aallartissapput, IOC-p Tokyomi unammiuaarnissamut ataqatigiissaarinermut ataatsimiititaliaani aamma siulittaasuusoq oqarpoq.

AAMMA ATUARUK OL-imi præsidenti: Coronavirusimut aatsaat akiuussutissaqalerpat aappaagu OL-ertoqarsinnaavoq

OL-ertoqarnissaa nunarsuaq tamakkerlugu tuniluuttoqarnera pissutigalugu 2021-mi pisussanngorlu marsimi kinguartinneqarpoq.

Timersornermi unammersuaartoqarnissaa Japanip killeqarfiisa nunami allamiunut suli matoqqaneranni akiuussutissallu piareersinissaanut suli qaammaterpassuit ukiullu suli ingerlasinnaanerani neriorsuutigineqarpoq.

Tamanna pissutigalugu OL-ip Tokyomi ilumut ingerlanneqarsinnaanersoq qassiiusut eqqarsarnartoqartippaat.

Japanimiut atorfilittaasa OL-ertoqarnissaata 2021-p kingorna kinguarteqqinneqarnissaa eqqarsaatiginngikkaat erseqqissaatigaat.

Qanittumi misissuisoqarnerata japanimiut sisamaagunik ataasiinnaap OL-ip aappaagu ingerlanneqarnissaa kissaatigigaat takutippaa.

AAMMA ATUARUK IOC-p aasaanerani OL-ertoqarnissaanik kinguartitsisoqarnera uppernarsaraa

Taakkulua OL-ertoqarnissaata kinguarteqqinneqarnissaa taamaatiinnarneqarnissaaluunniit kissaatigaat.

IOC-p suleqatigiissitaq nunarsuaq tamakkerlugu coronamik tunillaassuuttoqarnerani aappaagu OL-ertitsisoqarnerani qanoq pisoqarsinnaaneranik misissuisussaq pilersippaa.

Suleqatigiissitat Japanimit IOC-imilu atorfilittanik inuttaqartoq sapaatip akunnerani matumani siullermeertumik ataatsimiippoq.

- Taakku OL-ip ingerlanneqarsinnaaneranut qanoq suliniuteqartoqarsinnaaneranik maanna misissuissapput, John Coates oqarpoq.