Inuusuttut tarnimikkut annertuumik ikiligaanikut

Tarnip pissusaanik immikkut ilisimasalik Conni Gregersen, meeqqat inuusuttuaqqallu ulloq unnuarlu ornittagaani ukiuni 14-ini sullissisarsimasup, Torben Alnep radioaviisimi oqaaserisaa taperserpaa.

Tamanna aamma Inuusuttut Inaanni Qaqortumiittumi ukiuni kingullerni 27-ini pisortaasumit
Else Trolle Lund-imit ilisarineqarluarpoq.

-Siornatigut imaanikuugamik ilaqutariilluni ikioqatigiilluni tapersersoqatigiilluni inuuneq ajornannginnerujussuunikuuvoq.

Ukiuni kingullerni pissutsit annertuumik allanngorsimaneri tarnip pissusaanik immikkut ilisimasalimmik Conni Gregersennimit annertuumik malugineqarsimavoq.

-Taava suliffissuaqarneq atuutilerpoq, tamakkulu nassatarisaanik imigassamik annertuumik atuisoqalerpoq, taakku ataatsikkut atulerneratigut tarnikkut annertuumik ikiligaasalerneq aallartippoq.

Meeraq inuusuttuararluuniit siusinaarlugu ikiorsersinnaagaanni, meeqqamut inuusuttuaqqamulluuniit pitsaanerpaasoq Conni Gregersennip ilanngullugu oqaatigaa.

- Kingusinaartumik sullisileraangatsigit takusinnaasarparput ileqqumikkut paasinnittariaatsimikkullu inorsartuusartut. Tassa inunnit allanit suliassinneqaraangamik paatsoortarput, inunnillu allaniit suliassinneqarnertik ajortumik tigusarlugu, taamaasillutik paasisinnaanneq ajorpaat inunnit allanit piumaffigineqarneq, Conni Gregersen taama oqarpoq.

Ullutsinni meeqqat inuusuttullu ima sullitassaanerulertigisimapput, allaat Inuusuttut Inaani Qaqortumiittumi sulisut ikippallaalersimallutik.

- Sulisunik amerlanerusunik atorfissaqartitsisalernikuuvugut, suliassat annertunerulernerisa kinguneranik. Ineqartuutigut amerlassusaat taakkuinnaagaluartut, Else Trolle Lund oqarpoq. 

Ilaqutariittut ataqatigiittut inuuneq, ullutsinni atorneqarnera annikillinerusimasoq tarnip pissusaanik immikkut ilisimasalimmit maluginiarluarneqarsimavoq.

- Amerlasuutigut meeqqat uku pineqartut ilaquttaminnit paarineqarneq ajorput. Kalaallit Nunaani Ukiuni siullerni najugaqalerninni tusanngisaanangajappara inunnik isumaginninnermi sullissisut meeqqanik unnukkut arsaarinnittarnerat. Maanna tusartuartarpara inunnik isumaginninnermut sullissisut meeqqanik arsaarinnikkiartortuartut, allaat meeraaqqanik arsaarinnittarlutik, Conni Gregersen oqarpoq.