Inuusuttut suliffissaaleqisorpassuit Inuusuttut Ataqatigiit ernumanartoqartikkaat
Inuusuttut suliffissaaleqisut pillugit kisitsisit ukioq manna aggustimeersut takutippaat siorna piffissap taamaalineranut naleqqiullugit 181-inik ikileriarsimasut, Inuusuttulli Ataqatigiit isumaqarput suli ernumanartoqartoq:
Suliffissaaleqisut affaasa missaat inuusuttuupput
- Inuusuttut Ataqatigiinni ernumaginerpaavarput inuusuttut suliffissaaleqisut amerlanerujussuat. Suliffissaaleqisunimi 3167-iusunit 18-iniit 34-nut ukiullit 1446-pput, procentinngorlugu 46 procenterluinnangajaallutik, Inuusuttut Ataqatigiit siulittaasuat Múte Bourup Egede allappoq, nangillunilu:
- Inuusuttut suliffissaaleqisut amerlavallaarujussuarput arlaannillu ajortoqarneranik kisitsisit takutippaatigut. Maanna inuusuttut taama amerlatigisut suliffissaaleqiunnaarlutik sulileqqinnissaat anguniarlugu iliuuseqartoqartariaqalerpoq, Múte Bourup Egede oqarpoq.
Suliffissaaleqinerup annikillisarniarneqarnissaanut maannamut iliuusissat naammaginanngitsut, aaqqiigallarneruinnaasullu, Inuusuttut Ataqatigiit isumaqaput.
Aaqqiigallartarnerit pisariaqartarsinnaasut, taakku isumaqarput, taamaaliorniaraannili saniatigut siunissamut qulakkeerinnittunik iliuusissanik aamma pilersitsinissaq avaqqunneqarsinnaanngitsoq oqaatigaat:
Inuusuttut ukkatarinerullugit
- Inuusuttut Ataqatigiinni isumaqarpugut suliffissaaleqinermik ajornartorsiuteqarnerup tamakkiisumik suleqatigiiffiulluni aaqqiivigineqarnissaa anguneqartariaqalersoq. Kaammattuutigerusupparput Namminersorlutik Oqartussat, kommunit, inuussutissarsiortut susassaqartullu allat ataatsimoorlutik suliffissaaleqinerup aaqqiiviginissaanut tigussaasunik aaqqiissutissanik ujartueqatigeeqqullugit. Minnerunngitsumillu inuusuttut suliffissaaleqinerujussuannut aaqqiissutissanik nassaaqqullugit, Inuusuttut Ataqatigiit siulittaasuat Múte Bourup Egede oqarpoq.
