Inuusuttut siunissaqanngitsut

Kisianni inuusuttut atuarniarnikkut allanniarnikkullu ajornartorsiortut siunissamik pitsaasumik periarfissinnissaat aqqutissiuunniarlugu misissuisoqassasoq naalakkersuisup Mimi Karlsenip oqaatigaa.

Atuarniarnermikkut allanniarnermikkullu ajornartorsiortut meeqqat atuarfianniit atuarunnaartut eqqumaffigineqarnerusariaqartut, Mimi Karlsen Demokraatip Anda Uldumip paragraf 37 naapertorlugu apeqqutaanut akissuteqarnermi oqarpoq.

Ikiorsiivigineqarsinnaasunut allanut innersuunneqartarsimannginnerat ajornartorsiutaarsarsimasoq Mimi Karlsen oqarpoq.

- Ilumoorpoq meeqqat atuarniarnermi allanniarnermullu ajornartorsiuteqarlutik meeqqat atuarfianinngaanniit anisartut taakkua eqqumaffigineqartorujussuussariaqartut aamma sumut ingerlaqqinneri eqqumaffigineqartariaqarlutik, Mimi Karlsen oqarpoq.

Meeqqat atuarfiini ikiorsiinissamut periarfissaqartoq akissuteqarnermini nassuiaateqarpoq. Atuarfilli qimanneqaraangat periarfissat allat amigaataapput.

- Uani ukiut kingulliit ajornartorsiutaasarsimasoq tassaavoq, meeqqat allanniarnermikkut atuarniarnermikkullu ajornartorsiuteqartut taamatut nalilersorneqarnermikkut ikiorsiivigineqarsinnaasunut allanut toqqaannartumik innersuunneqartarsimannginneri. Isumaqarpungalu taanna iliuuseqarfiginiarlugu massakkut iliuuseqartugut, Mimi Karlsen oqarpoq.

Inersimasut allanniarnermikkut atuarniarnermikkullu ajornartorsiuteqartut meeqqat atuarfiannit atuarunnaarnermi kingorna sumiinnersut aamma sulerinersut maanna nalunaarsorneqarsimanngitsut, Mimi Karlsenip nassuiaatigaa.Tamannalu maanna iliuuseqarfigineqarumavoq.

- Soorlu massakkut meeqqat atuarfiannik qimatsereersut inersimasut periarfissaanik ujartuivugut. Qanoq ililluta nalunaarsorsinnaavagut qanorlu amerlatigisut qanoq ililluta nalunaarsorsinnaavagut, una nalunngittussaavarput ajornartorsiut qanoq atsiginersoq qanorlu iliuuseqarfigineqarsimanersoq? Mimi Karlsen oqarpoq.

Atuarniarnermi allanniarnermilu ajornartorsiutilinnut neqeroorutissanik ineriartortitsinissamut siunertaqartumik martsip 22-anit Nuummi ataatsimeersuartoqassaaq.

Naalakkersuisullu suliniutissaanik aamma kaammattuisoqarfiusussamik kingorna ataatsimeersuartitsisoqaqqissallutik.